Koronavırýstyń aldyn alý úshin eń qajetti sharanyń biri vaksına ekenin álemdik tájirıbeden anyq kórip otyrmyz. Sondyqtan Batys Qazaqstan oblysynda da ekpe alý isi júıeli jolǵa qoıyldy. Búginde óńirde oblys boıynsha 66 ekpe pýnkti jumys isteıdi.
Al múgedekter qataryndaǵy múmkindigi shekteýli adamdardy vaksınalaý úshin arnaıy top olardyń úıine baryp, ekpe jasap júr.
– Batys Qazaqstan oblysynda halyqty koronavırýs ınfeksııasyna qarsy kezeń-kezeńimen vaksınalaý sharasy 2021 jyldyń 1 aqpanynan bastaldy. Vaksına aýmaqtyq medısınalyq uıymdardyń egý pýnktterinde, al arnaıy kontıngentti vaksınalaý tıisti vedomstvonyń qyzmet orny boıynsha júrgiziledi. Halyq úshin vaksınany qoljetimdi etý jáne egý prosesin jeńildetý maqsatynda jyljymaly egý pýnktterin, kóshpeli egý brıgadalaryn uıymdastyrdyq. Búginde ekpe pýnktteri barlyq aýdanda bar, – deıdi sanıtarlyq-epıdemııalyq basqarmanyń baspasóz hatshysy Ádemi Ǵıbratqyzy.
О́ńirde sońǵy kúnderi ekpe alý isi qarqyn ala túsken. Máselen, 27 maýsymdaǵy málimette vaksınanyń 1-komponentin 90 658 adam, 2-komponentin 59 961 adam alǵany habarlandy. Al 29 maýsymda oblysta vaksınanyń 1-komponentin alǵandardyń sany 92 896 adamǵa, 2-komponentin alǵandar 61 459 adamǵa jetken. Iаǵnı eki kún ishinde 2 238 adam ekpeniń alǵashqy dozasyn alsa, 1 498 adam ekinshi márte egilip, vaksına tólqujatyna ıe bolǵan.
Batys Qazaqstan oblysy
