Aqparattyq tehnologııalar salasynda óziniń kompanııasyn ashyp, eksporttyq naryqta alǵa jyljyp kele jatqan qazaqstandyq jastardyń jarqyn ókilderiniń biri – «Akhter Studio» kompanııasynyń dırektory jáne quryltaıshysy Admet Akhter.
«Akhter Studio» – Almaty qalasynda negizdelgen baǵdarlamalyq jasaqtama óndirýshisi, jumysynyń alǵashqy aılarynan bastap sheteldik klıentterdi tarta bastady jáne nebári alty aıdyń ishinde shtattaǵy adam sany 3-ten 30-ga deıin ósti. Qazirgi ýaqytta komanda quramynda Almaty, Nur-Sultan, Bishkek jáne Máskeý turǵyndary bar, al stýdııa Astana Hub rezıdenti bolyp tabylady.
Admettiń sıfrlyq jáne aqparattyq tehnologııalar salasynda 8 jyldan astam tájirıbesi bar. Uzaq ýaqyt boıy ol ózge kompanııalarda jaldamaly jumysshy bolyp kelgen. Ol sheteldik klıenttermen jumys jasaýdyń barlyq múmkindikterin túsine bastaǵan ýaqytta, óz kásibin qolǵa alýdy uıǵardy.
Onyń IT eksportyndaǵy eń alǵashqy qadamy, ol baǵdarlamashylarǵa arnalǵan eń iri mektepterdiń biri - SkillFactory-men kelisimshartqa otyryp, product-menedjmentti onlaın oqytqan ýaqyttan bastaldy.
Sonan keıin, Admet AQSh pen Kanadadaǵy eń iri SMS marketıngtik ónimderiniń biri bolyp tabylatyn amerıkandyq Simple Texting kompanııasyna «Technical product» menedjeri bolyp jumysqa ornalasty.
Qazaqstandyq jigittiń Amerıkandyq kompanııada jumys isteý barysynda kóptegen klıentter men kompanııalardan turatyn tanystyq júıesi ulǵaıa tústi. Osy oraıda, oǵan óziniń jeke IT stýdııasyn uıymdastyrý ıdeıasy keldi.
Admet óziniń aýtsorsıngtegi tańdaýy IT salasyna túskeniniń basty sebebin, bul salanyń kadrlarǵa degen joǵary suranysymen jáne qazaqstandyq mamandardyń básekege qabilettiligimen túsindirdi.
«Bizdiń mamandar qyzmetiniń quny, Ýkraına jáne Belarýs elderimen salystyrǵanda áldeqaıda tómen, óıtkeni bul elder ózderiniń qyzmetterin uzaq ýaqyt eksporttap keledi jáne sheteldik kompanııalar arasynda jaqsy ımıdj qalyptastyrǵan. Qazir olardyń baǵasy batystyq baǵalarǵa jaqyn», deıdi ol.
Onyń oıynsha baǵdarlamashylarǵa zamanaýı tehnologııalar shekarany syzyp tastap, turǵylyqty mekenine qaramastan, álemniń túkpir-túkpirinen jumys tabý múmkindigin berdi. Baǵdarlamashy ultqa, elge bólinbeıdi, eń maǵyzdysy kásibı sheberlik pen kommýnıkasııa qabileti.
Qazirgi tańda olardyń toby product owner, dızaınerler, baǵdarlamashylar, QA, DevOps-tan turady, bul olarǵa jobalardy tolyqtaı júzege asyrýyna múmkindik beredi.
Admet sheteldik kompanııalardyń Qazaqstandyq jigitterge degen kózqarasy ózgerip keledi deıdi. Sheteldikter jerlesterimiz týraly kóbirek málimet bilýge nıet bildirýde, sebebi bizdiń qazaq jigitteriniń aǵylshyn tilin jetik bilýi olar úshin jańalyq boldy deıdi ol.
«Qazaqstandyq baǵdarlamashylar sheteldik kompanııalar úshin úlken jańalyq boldy. Sheteldik seriktester jerlesterimizdi áli eshkim ashpaǵan altyn ken ornyna baǵalap, bizben alǵashqy seriktes bolǵylary keletinin jasyrmady», deıdi Admet.
Admettiń oıynsha, sheteldikterdi Kazaqstandaǵy IT sapasynyń joǵary ekendigine sendirý úshin, elimizdegi IT prektterdi búkil álemge tanytyp, osy baǵytta elder arasynda ózimizdiń durys ımmıdjimizdi qalyptastyrýymyz kerek.
«Bizdiń mamandar bul salada qarqyndy damyp jatyr, bizde sátti jobalarymyz óte kóp jáne biz eshkimnen kem túspeımiz», dedi ol.
