– Aqshalaı utysty ótkizýdegi maqsat – turǵyndardy vaksına alýǵa yntalandyrý. Sol utys oıynynyń júlde qoryna 40 mln teńge salyndy. Onyń 10 mln teńgesi bas júldege beriledi. Utys oıyny 30 maýsymda bastaldy. Endi ár on kún saıyn 200 myń teńgelik 10 sertıfıkat oınatylady. Bul 30 qyrkúıekke deıin jalǵasady. Tamyz aıynda 30 maýsym-31 shilde aralyǵynda vaksına alǵandar úshin 3 mln teńge kólemindegi eki sertıfıkat utysqa shyǵarylady. Al qyrkúıekte 1-31 tamyzda ekpe alǵandar úshin taǵy 3 mln teńgeniń eki sertıfıkatyn oınatýdy kózdedik. Qazan aıynda bas júlde – 10 mln teńgeni utý úshin 1 aqpan-30 qyrkúıek aralyǵynda vaksınanyń birinshi nemese ekinshi komponentin saldyrǵan turǵyndar qatysady, – deıdi «Azamattyq alıans» ZTB tóraǵasy Álibek Semǵalıev.
Onyń aıtýyna qaraǵanda, jeńimpazdar Atyraý oblystyq «Azamattyq Alıans» ZTB-nyń áleýmettik jelisindegi tikeleı efırinde anyqtalady. Jeńimpazdardy anyqtaýǵa atalǵan aksııanyń ashyqtyǵyn qamtamasyz etý úshin úkimettik emes uıymdardyń ókilderi, blogerler men qoǵam belsendileri tartylmaq.
Al H.Dosmuhamedov atyndaǵy Atyraý ýnıversıtetiniń basshylyǵy da vaksına alǵan oqytýshylar men stýdentterdi yntalandyrýǵa nıet tanytyp otyr. Naqtylaı aıtqanda, koronavırýs ınfeksııasyna qarsy ekpe alǵan qyzmetkerler men professorlyq-oqytýshylyq quram arasynda 30 000 teńgeniń birjolǵy aqshalaı syılyǵyn, sondaı-aq stýdentter úıindegi basseınge barýǵa 50 paıyzdyq jeńildikti usyný kózdelipti. Al vaksına alǵan stýdentter arasynda 30 týrıstik joldama men úsh noýtbýk oınatylady. Stýdentterge oqý aqysyn tóleý kezinde 30, 50, 100 paıyzdyq jeńildik alýǵa, aǵylshyn tilin oqytý kýrsyna tegin qatysý úshin lotereıa oınatý josparlanypty.
Atyraý oblysy
