«Eki aı boıy jıhazymyzdy kúttik. Jıhaz da, aqsha da joq. Meniń qolyma jetpegen jıhaz úshin aı saıyn 42 myń teńge tóleýge májbúrmin. Jeńildik izdep, alaıaqqa tap boldyq», deıdi Aqtaý turǵyny Jadyra О́tenova.
Ol 405 myń teńgege nesıe rásimdep, as úı garnıtýrasyna tapsyrys bergen.
О́tenovamen birge jıhaz salonynda jalpy somasy 20 mıllıon teńgeden asatyn 20-ǵa jýyq adam jıhazǵa tapsyrys bergen. Bireýleri qolma-qol aqshamen tólese, basqalary bank arqyly aýdarymdar jasaǵan.
«Aqtaý polısııa basqarmasyna alaıaqtyq is-áreketter faktisi boıynsha birqatar ótinish tústi. Kásipker jıhazdy ýaqytynda jasaýǵa ýáde berip, biraq tapsyrystardyń qunyn alǵannan keıin ýádesin oryndamaǵan. Jedel izdestirý is-sharalary barysynda polısııa qyzmetkerleri kúdiktiniń kim ekenin anyqtady. Qazirgi ýaqytta bul azamatty ustaý sharalary júrgizilýde», dedi Mańǵystaý oblysy PD baspasóz hatshysy Áıgerim Ibatýllaeva.
Kásipkerdiń buǵan deıin de alaıaqtyq úshin jaýapqa tartylǵany anyqtady. Endi jańa is boıynsha er adamnyń múlki tárkilenip, jeti jylǵa deıin bas bostandyǵynan aıyrylýy múmkin.
