Kıimniń dızaıneri – Salta brendimen tanymal Saltanat Baımuhamedova. Qazaqstandyq atletterge arnalǵan sporttyq kıim úlgisin ıspandyq Joma kompanııasy jasady.
Olımpıadaǵa arnalǵan formany daıyndaý kezinde kıim dızaıny, matalar men kıim elementterin sportshylardyń ózderi tańdady. Osy jyldyń qańtar aıynan bastap elimizdiń jetekshi sportshylary Olımpıadalyq kıim-keshekterdi tańdaýǵa arnalǵan talqylaýǵa, tanystyrýlar men kezdesýlerge qatysqan bolatyn.
«Árbir sportshy úshin Olımpıada oıyndary – bul sporttyq mansaptaǵy eń mańyzdy oqıǵa, oryndalǵan arman, kóptegen jyldar boıy qajyrly jáne uzaq jattyǵýlardyń nátıjesi. Tokıodaǵy Olımpıada oıyndary – sportshylardyń qazirgi býyny úshin kópten kútken oqıǵa. Tokıodaǵy Olımpıada oıyndaryna qatysty barlyq másele ótken jyldan bastap belgisizdikpen birge júrdi. Olımpıadany keıinge qaldyrý, lokdaýndar, jarystardaǵy tájirıbeniń bolmaýy, biliktilik týrnırlerin keıinge qaldyrý nemese joıý. Bizdiń mindetimiz sportshylarymyz úshin barlyq jaǵynan, sonyń ishinde olımpıadalyq kıim sııaqty máselelerde barynsha qolaıly jaǵdaı jasaý boldy. Sondyqtan ulttyq formany tańdaý quqyǵy quramyna 35 sportshy kiretin komıssııaǵa berildi», delingen QR UOK málimdemesinde.
«Olımpıadalyq kıim qandaı bolatynyn tańdamas buryn, sportshylardyń ózderinen pikir suradyq. Biz matalardy tańdaýǵa qatystyq, eskızderdi talqyladyq, usynystar jasadyq. Olımpıada oıyndarynda tek syrtqy túri ǵana emes, sonymen qatar kıimniń tıimdiligi men sapasy da óte mańyzdy», dedi dzıýdoshy, Rıo Olımpıadasynyń júldegeri Eldos Smetov.
Olımpıadaǵa arnalǵan sporttyq kıimge usynylǵan stıl – talǵampaz kejýal sport. Dızaınerler kolleksııanyń yńǵaılylyǵyna, beriktigine, ózektiligine kepildik bere otyryp, usynylǵan kıimderdiń kútimi ońaı ekenin atap ótti.
Sportshylar formany Olımpıada oıyndarynyń ashylý sherýi men basqa da saltanatty is-sharalar kezinde kıedi. Saltanatty forma tujyrymdamasy bizdiń zamanaýı mádenı kodymyzdy aıqyndap kórsetedi.
Matalardy tańdaý kezinde jyldyń osy ýaqytyndaǵy Japonııanyń klımattyq erekshelikteri de eskerýsiz qalmady. Olımpıadalyq kıimder aýany jaqsy ótkizedi, ylǵaldy sińiredi, tez kebedi jáne allergııa týdyrmaıdy. Saltanatty kıimniń negizgi tústeri – kók, kógildir jáne aq tústi bolmaq.
