Esirtki zerthanasy mefedron jáne amfetamın sııaqty sıntetıkalyq esirtki óndirýmen aınalysqany belgili boldy.
«Esirtki zerthanasy men olardy ári qaraı satý úshin uıymdastyrylǵan ınternet-dúken elordanyń elıtalyq turǵyn úı keshenderiniń birinde jaldamaly páterde ornalasqan. «О́ndiris» uıymdastyrýshysy sıntetıkalyq esirtkini óndirý jáne odan ári satý úshin alǵan bilimderin paıdalanǵan 27 jastaǵy sertıfıkattalǵan bıotehnolog ekeni anyqtaldy. Tintý barysynda kúdiktiden sıntetıkalyq esirtkilerdi daıyndaý formýlalary bar dápter, elektrondy tarazylar, psıhoaktıvti zattardy óndirýge arnalǵan hımııalyq komponentter, psıhotroptyq zattar salynǵan kolbalar, býyp-túıýge arnalǵan polıetılen paketter, esirtki dıleri ótkizgen derbes kompıýter, sondaı-aq salmaǵy 10 gramnan asatyn satýǵa daıyn «sıntetıka» tabylyp, tárkilendi», dep habarlady polısııadan.
Ustalǵan adam esirtkini óziniń ınternet-dúkeni arqyly adamdar kóp jınalatyn jerlerde, saıabaqtarda jáne oıyn alańdarynda qaldyrǵan betbelgiler arqyly satqan.
«Elordanyń qalalyq saıabaqtarynyń birinde jedel-tergeý is-sharalary barysynda ustalǵan azamat polısııa qyzmetkerlerine esirtki salynǵan qoqys jáshikterin kórsetti. Júrgizilgen operasııa nátıjesinde esirtki qylmysyna qarsy is-qımyl basqarmasynyń qyzmetkerleri zańsyz aınalymnan sıntetıkalyq esirtkiniń 60-tan astam bir rettik dozasyn tárkiledi», dep tolyqtyrdy polısııa.
Kúdikti qamaýǵa alynyp, Qylmystyq Kodekstiń 297-babynyń 3-bóligi boıynsha múlki tárkilenip, 15 jylǵa deıin bas bostandyǵynan aıyrýdy kózdeıtin aıyp taǵyldy.
Tártip saqshylary atap ótkendeı, jyl basynan beri bul ekinshi oqıǵa. Budan buryn alty aı ishinde zańsyz aınalymnan 45 kılogramnan astam túrli esirtki quraldary, onyń ishinde geroın, marıhýana, gashısh jáne sıntetıkalyq esirtki tárkilengen zerthana tabyldy. 12 qylmystyq is qozǵaldy.
