Talǵar aýdanynda ornalasqan «Baıserke-Agro» JShS janynan ashylǵan jańa kásiporyn jylyna 36,5 myń tonnalyq qýattylyqqa ıe. Jobalyq quny - 1,4 mıllıard teńge. Zaýytta 15 jumys orny ashylǵan. Nysannyń iske qosylý saltanatyna oblys ákimi Amandyq Batalov, «Baıserke-Agro» agroholdınginiń prezıdenti Temirhan Dosmuhambetov, óńirge jumys saparymen kelgen bir top senatorlar, ǵalymdar men agrarlyq sala mamandary qatysty.
Talǵar aýdany ákiminiń orynbasary Ermek Tolqynovtyń aıtýynsha, aýdanda buǵan deıin mundaı iri zaýyt bolǵan joq. Maldyń jemi tek kórshi aýdandardan jetkiziletin. Endi qyzmetin endi bastaǵan zaýyt «Baıserke-Agro» agroholdıngke arnap mol jem qoryn qalyptastyryp qana qoımaı, aýdannyń, tipti oblystyń aýmaǵyndaǵy malmen aınalysatyn sharýashylyqtar úshin zor paıda ákelmek.
«Mal basyn azaıtpaý tásiliniń biri – oǵan qajetti jem qoryn qalyptastyrý. Sondyqtan mal azyǵyn daıyndaıtyn jańa zaýyttyń ashylýy óńirdiń aýyl sharýashylyǵy úshin úlken múmkindikterge jol ashady. Tehnologııany saqtaý, ǵalymdarmen birlesip jumys isteý óte mańyzdy. Sonda biz mal basy sanyn ósirip qana qoımaı, sý jáne basqa da tabıǵı baılyqtardyń jetispeýshiligin sezinbesten mol ónim ala alamyz. Ol úshin bizge eń aldymen ǵylymı kózqaras, joǵary bilikti mamandar, aýyl sharýashylyǵy daqyldarynyń zamanaýı sapaly sorttary, ónimdiligi joǵary mal tuqymy qajet. Bizdiń bolashaǵymyz – agrarlyq salada, sondyqtan osy salany damytý - asa jaýapty da qajetti shara», dedi senator Aqylbek Kúrishbaev jetisýlyqtardy mańyzdy kásiporynnyń ashylýymen quttyqtaǵan sózinde.
