Teatrlyq kópshilik sahna kórinisteriniń ereksheligi – sahna keńistigindegi ár buryshtyń ózindik ómiri, tynys-tirshiligi boldy. Al osynaý tirshilikke reseılik opera rejısseri Mıhaıl Pandjavıdze jan bitirip, mızanssenalardy aıryqsha talǵammen ornalastyrdy.
Bul keshte sımfonııalyq orkestr árbir nómirde túrli dybystaldy. Oǵan kásibı dırıjerler – Qazaqstannyń eńbek sińirgen qaıratkeri Abzal Muhıtdın, Djýzeppe Akýavıva (Italııa), Rýslan Baımýrzın jetekshilik etti. Al bas hormeıster – Qazaqstannyń eńbek sińirgen qaıratkeri Erjan Dáýitov.
Aıgúl Nııazova men Saıan Isınniń oryndaýyndaǵy M.Tólebaevtyń «Birjan – Sara» operasynan Aıtys pen Mereke bı keshtiń shymyldyǵyn ashty, ulttyq nómirler batys eýropalyq klassıkamen almasty – S.Muhamedjanovtyń «Aısulý» operasynan Serkeniń kavatınasy, Dj.Pýchchınıdiń «Toska» operasynan kórinis, «Týrandot» operasynan Kalaftyń arııasy jáne taǵy basqa kóptegen kompozısııalar oryndaldy. Sondaı-aq Marıandjela Sısılııa, Rıkkardo della Shýkka, Mattıa Rossı (Italııa), Badral Chýlýýnbaatar (Mońǵolııa), Baýyrjan Ánderjanov, Medet Chotabaev, Jupar Ǵabdýllına, Talǵat Musabaev, Saltanat Ahmetova, Azamat Jyltyrkózov, Alfııa Karımova, Bolat Esimhanov, Shyńǵys Rasylhan, Rasýl Jarmaǵambetov jáne t.b. opera sahnasynyń tanymal esimderi óner kórsetti.
«Mundaı mańyzdy konserttiń qatysýshysy bolǵanyma qýanyshtymyn. Nur-Sultanda alǵash ret óner kórsetý múmkindigi týdy, osy shahardyń, osyndaı keremet teatrdyń tamasha energetıkasyn sezindim. Búgin ózim úshin qashan da mańyzdy bolǵan ári mańyzdy bolyp qala beretin eki arııany – Sh.Gýnonyń «Romeo men Djýletta» operasynan Djýlettanyń arııasyn jáne Dj.Verdıdiń «Travıata» operasynan Vıolettanyń arııasyn oryndadym. Menimen birge sahna tórinde «Astana Opera» Halyqaralyq opera akademııasynyń bir bóligi sanalatyn ánshiler, oqytýshylar óner kórsetti, olardyń oryndaýshylyǵyna, dybystalýyna tánti boldym. Jas daryndardy osyndaı joǵary deńgeıde úılestirilgen akademııada oqýǵa tartý óte mańyzdy dep esepteımin», dep atap ótti Marıandjela Sısılııa.
Al Rıkkardo della Shýkka: «Jas ánshilerdiń damýy men óz tájirıbesiniń aýqymyn keńeıtýge múmkindik berýdiń paıdasy zor dep bilemin. La Skala teatrynyń Akademııasy maǵan osy múmkindikti berdi, álemdegi barlyq jas ánshilerge, onyń ishinde jańa Astana Opera Halyqaralyq akademııasynyń vokalısterine osyndaı tájirıbeden ótýge keńes beremin», dedi.
Saltanatty keshke Mádenıet jáne sport mınıstri Aqtoty Raıymqulova, teatr qaıratkerleri, mýzykalyq synshylar men basqa da mádenıet, qoǵam qaıratkerleri qatysty.
Eske sala keteıik, Astana Opera Halyqaralyq opera akademııasy vokalıstermen óz jumysyn kúzde bastaıdy.
