Qalalyq ákimdikte ótken kezdesýde Májilis depýtattary eń aldymen qalanyń tazartý qurylystary men qoqys polıgonynyń problemalaryn kóterdi.
Aıjan Skakovanyń aıtýynsha, qalanyń sarqyndy sýy Balqashtan 25 shaqyrym jerde ornalasqan sý jınaǵysh toǵanǵa esh tazartýsyz aǵyp jatyr. Káriz tazartý qurylystaryn salý 6,8 mıllıard teńgege baǵalanyp otyr, al qala bıýdjetiniń barlyq kirisi 6,5 mıllıard teńgeni quraıdy. Jergilikti bılik tazartý qurylystaryn bastaý úshin syrtqy qaryzdardy tartýdy josparlap otyr.
Qala turǵyndary úshin taǵy bir ózekti másele – 2015 jyly óziniń áleýetti qýatyn óndirgen kommýnaldyq qaldyqtardyń qoqys polıgony. Jańasyn salý úshin ázirge tek tehnıkalyq-ekonomıkalyq negizdeme ázirlendi. Depýtattardyń pikirinshe, másele Balqash - týrıstik qala ekendigimen kúrdelene túsedi jáne ony turǵyndar men kelýshi týrısterdiń múddesi úshin damytý qajet.
Májilis depýtattary joldardy jóndeý, kólik ınfraqurylymyn damytý qajettiligine erekshe nazar aýdardy.
«Áıgili kóli bar qala týrızmdi damytý boıynsha on aımaqtyń qataryna kiredi. Qalany týrızmdi damytý esebinen ekonomıkalyq ósý núktesi retinde túsinýge degen kózqarasty tujyrymdamalyq turǵydan ózgertý qajet. Tıisinshe, máselelerdiń keshendi túrde sheshilýin qamtamasyz etý qerek», dep esepteıdi Májilis depýtaty Erlan Smaılov.
Sonymen qatar jas jáne kópbalaly otbasylardy turǵyn úımen qamtamasyz etý, halyqtyń áleýmettik osal toptaryn qoldaý, Saıaq kentin sýmen qamtamasyz etý máseleleri de kóterildi.
