Koronavırýs • 12 Shilde, 2021

700-den astam adam aýrýhanada jatyr

Batys Qazaqstan oblysynda koronavırýstan emdeıtin arnaıy stasıonarlarda emdelip jatqan naýqas sany 731-ge jetti. Indet bastalǵaly oblysta 420 adam COVID-19-dan kóz jumǵan.

Qazbek QUTTYMURATULY

Osy kezge deıin oblysta koronavırýs ınfeksııasyn juqtyrǵan 26 379 adam tirkelgen eken. Indet juqtyrǵandardyń 78,6-%-y, ıaǵnı 20 735 adam jazylyp shyqqan. Sonyń ishinde 9 668 adam stasıonarlyq, 11 067 adam ambýlatorııalyq em alǵan.

– Shildeniń 9-ynda oblystyń ınfeksııalyq stasıonarlaryndaǵy 97 reanımasııalyq tósektik orynda 54 naýqas emdelip jatyr. Jansaqtaý bólimderiniń tolymdylyǵy 60 paıyzǵa taıady, – deıdi oblystyń bas sanıtar dárigeri Muhamǵalı Aryspaev.

Reanımasııalyq tósekte jatqan naýqastar negizinen jasy 60-tan asqan egde jandar eken. Júrek-qan tarymy, dıabet sekildi qosalqy dertter koronavırýstyń qaýiptiligin kúsheıte túsedi. Sondyqtan mamandar qarııalarǵa, sozylmaly derti bar jandarǵa saqtyq sharalaryn kúsheıtýdi, kópshilik oryndarǵa barmaýdy eskertýde.

Sońǵy málimetterge qaraǵanda, koronavırýsqa qarsy vaksınanyń II komponentimen óńirde barlyǵy 71 502 adam egilgen. Bul jalpy oblys halqynyń 10 paıyzynan sál ǵana artyq.

– Bul óte az! Turǵyndardyń basym kópshiligi ekpe almaıtyn bolsa, koronavırýstyń taralý qarqynyn tejeý múmkin emes, – deıdi Muhamǵalı Aryspaev.

Oblysta ekpe jumysy bıylǵy
1 aqpanda bastaldy. Sodan beri óńirge vaksınanyń 320 050 dozasy kelip túsken. Munyń 188 000 dozasy – I komponent, 132 050 doza – II komponent. Onyń ishinde Reseıde óndirilgen Spýtnık V vaksınasy – 247 050 doza. Otandyq QazVas vaksınasy – 7 myń doza, Birikken Arab ámirlikterinde óndirilgen Hayat Vax vaksınasy – 50 myń doza, Qytaıda óndirilgen CoronaVac vaksınasy – 16 myń doza eken.

Jalpy, oblys boıynsha vaksınanyń I komponentimen 122 187 adam egilgen. 91 092 adam – Spýtnık V ekpesin, 1 959 adam – QazVac, 22 901 adam – Hayat Vax, 6 235 batysqazaqstandyq CoronaVac vaksınasyn tańdaǵan.

– Halyqty COVID-19 koronavırýstyq ınfeksııasynan qorǵaýdyń jalǵyz ári tıimdi joly – vaksınalaý. Ekpeniń nátıjesinde adamzat sheshek syndy asa qaýipti aýrýdy jeńip, dıfterııa, qyzylsha, sirespe jáne taǵy basqa aýyr ınfeksııalyq aýrýlarǵa qatysty salystyrmaly epıdemııalyq turaqtylyqqa qol jetkizdi. Dúnıejúzilik densaýlyq saqtaý uıymynyń usynymy boıynsha, ujymdyq ımmýnıtet qalyptastyrý úshin halyqtyń 60%-dan kem emes bóligi vaksınalanýy tıis. Aımaqta epıdemııalyq jaǵdaıdyń nasharlaýyna jol bermeý úshin sanıtarlyq normalardy qatań saqtaıyq, adam kóp jınalatyn qoǵamdyq oryndarǵa barmaıyq! – deıdi óńirdiń bas sanıtar dárigeri.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz