Aýyl ákimderin tikeleı saılaý árbir qazaqstandyqqa qaı partııaǵa músheligine nemese múshe emestigine qaramastan, óziniń konstıtýsııalyq quqyǵyn iske asyrýǵa múmkindik beredi. Jergilikti turǵyndar aýyl máselesiniń tıimdi sheshilýine árdaıym múddeli. Endi bizge oǵan tikeleı atsalysyp qana qoımaı, jumystyń nátıjesine áser etýge jol ashyldy. Kez kelgen azamattyń úmitker retinde ózin usyna alýy búkil saılaý prosesiniń básekelestigine jańa serpin bermek. Al biregeı erekshelik – turǵyndardyń saılaýdy basynan aıaǵyna deıin baqylaı alatyndyǵy. Atap aıtqanda, naqty úmitker úshin daýys berýden bastap, ákimdi saılaý, onyń ákim laýazymyndaǵy qyzmetiniń barysyn baǵalaýǵa deıin. Eger turǵyndar aýyl ákimi óz mindetin durys atqarmaı júr dep sanasa, ákimge senimsizdik bildirip, votým jarııalaı alady. Olar saılaýshy quqyǵyn tolyǵymen paıdalana alady.
Jańadan saılanǵan ákim óz saılaýshylarynyń aldyndaǵy jaýapkershilikti tolyq sezinýge tıis.
Sonymen birge daýys berý quqyǵy bar saılaýshylardyń jalpy sanynyń keminde 1 paıyzynyń qolyn jınaǵan azamat ózin úmitker retinde usyna alýy qýantady. Bul – ádil básekede baq synap, jeńiske jetkisi keletinder úshin úlken múmkindik.
Joǵaryda atalǵan ózgerister azamattardyń belsendiligi men sana-seziminiń artýyna yqpal etedi. Árbir qazaqstandyq osy saılaýǵa qatysý arqyly óz aýylynyń bolashaǵyna áserin tıgize alatynyn túsinýi kerek. Elimizdiń ár azamatyna óziniń jeke jaýapkershiliginiń júgin sezinetin kez keldi, óıtkeni Qazaqstan – biz jalǵa alǵan baspana emes, ol – bizdiń ortaq úıimiz.
Almagúl QOZBAEVA,
«Kaisar-KZ» qoǵamdyq birlestiginiń tóraǵasy
Pavlodar oblysy
