Shildeniń shilińgir ystyǵynda keshkilik dostarymen birge Qarǵaly ózeniniń jaǵasynda serýendep júrgen 20 jastaǵy Muhtar oqıǵaǵa tap boldy. О́zen jaǵasynda bir top adamnyń spırttik ishimdikter iship otyrǵanyn kóredi. Sol jerde toptanyp masań kúıde otyrǵan er adamdardyń biri sýǵa shomylmaq bolady. Beıtanys sýǵa túsýge bara jatyp, Muhtar men dostarynan jaǵada otyrǵandardy syrttaı baqylap qoıýdy ótingen eken. Alaıda olardan taıaqtastam jerde otyrǵan Muhtar kóziniń qıyǵymen ishimdik ishkenderdi emes, sýǵa súńgigen jigitti baǵyp otyrǵan. Beıtanystyń sý betine qaıtyp shyqpaı qalǵanyn baıqaǵan ol oılanbastan kómekke umtylady. Birer mınýt ishinde Qarǵaly ózeniniń 4 metr tereńdiginen batyp bara jatqan jigitti alyp shyqty. Sóıtip qas-qaǵym ýaqyt ishinde 20 jastaǵy Muhtar ózinen 8 jas eresek jigittiń ómirin qutqaryp qaldy. Qarǵaly ózeniniń boıyndaǵy shomylýǵa tyıym salynǵan jerde ishimdik ishkenderdiń «saıahaty» osylaısha qaıǵyly aıaqtala jazdady.
Muhtar sol jerde dostarymen birge essiz jatqan adamǵa jedel járdem kelgenshe alǵashqy medısınalyq kómek kórsetip úlgerdi. Stýdentter naýqasty jasandy dem aldyryp, júrek tusyn ýqalady. Kóp keshikpeı kelip jetken dárigerlerge qutqarylǵan, biraq aýyr kúıde jatqan naýqasty tapsyrǵannan keıin olardyń ıyqtarynan aýyr júk túskendeı boldy. Shomylýǵa ruqsat etilmegen jerde mas kúıinde sýǵa túsken er adam jedel járdem aýrýhanasynyń jansaqtaý bólimine aýyr halde jetkizilip, biraz kúnnen keıin ǵana esin jıdy.
Batyl stýdent shildeniń basynda bolǵan osy jaǵdaıdy umytyp ketse de, Tótenshe jaǵdaılar departamentiniń basshylyǵy umytpaı, Muhtar Túlkibaevty vedomstvolyq nagradamen marapattaý týraly mınıstrlikke ótinish joldady.
Aqtóbe oblysy
