Bul ataq rejısserge «Marııam» fılmi úshin berildi.
«Men úshin kútpegen jańalyq boldy. «Marııam» fılmi buǵan deıin birneshe halyqaralyq syılyqqa ıe bolǵan. Festıvaldaǵy taǵdyry toqtaǵan shyǵar dep oılaýshy edim. Eýropada Ortalyq Azııadan «Úzdik rejısser áıel» atanǵanyma erekshe qýanyshtymyn», deıdi rejısser.
Fılm kúıeýi joǵalyp ketken soń tórt balasymen shalǵaıdaǵy aýylda qystap qalǵan Marııam atty áıeldiń ómirin baıandaıdy. Basty róldi sol keıipkerdiń prototıpi Merýert Sabýssınova oınaǵan. Merýert balalarymen alys aýylda turady, kúıeýi birshama ýaqyt buryn týystarymen birge jumysqa ketip, qaıtyp oralmaǵan. Rejısser keıipkerdiń otbasyndaǵy osy oqıǵany estigen soń fılm túsirýge bekinipti.
Fılm osyǵan deıin Lokarno, Toronto, Pýsan, sondaı-aq Túrkııa men Ispanııadaǵy kınofestıvaldarda kórsetildi. Qazirgi ýaqytta Sharıpa Orazbaeva jańa týyndysyn túsirip boldy.
