Qazaqstan • 17 Shilde, 2021

Alyp Altaı – judyryqtaı júrekte

603 ret kórsetildi

Jaz shyqsa, taý kezip ketýdi kókseıtinimiz ne osy?! Bul joly Búrkit shyńnyń jelke jaǵyndaǵy Uńǵy deı-tuǵyn ken ornyn kórip qaıtpaq bolyp, at erttedik. Joldyń biz bilmeıtin soqpaǵy kóp bolǵan soń, Ulttyq parktiń ınspektory Aıdyn Shákenovtiń sońynan erdik.

Atty bes jigit Qomshabaıdy basyp ótip, Uńǵynyń bergi basyna jetip toqtadyq. Kún sáskege taıaǵan.

02

Sál tynyǵyp, júrek jalǵaǵan soń qos taýdyń arasyndaǵy jazyqqa shyǵyp, Shyǵysqa qaraı bettedik. Quba bel. Quba belde myń túrli gúl, myń túrli shóp. Jupar ıis tanaýdy qytyqtaıdy. Biraq, shóbi at baýyrlaıtyndaı emes, ap-alasa. Qaıtkenmen, bıik jer ǵoı. Jazy kelte, túni sýyq.

04

– Dr-r-r, – dedi Aıdyn attyń basyn tartyp. – Áne-e-e, qarańdar. Shahtanyń aýyzy kórindi. Jaqyndasań túpsiz tuńǵıyq. Qorqynyshty. Arǵy jaǵynan bireý julyp alatyn sııaqty, – dedi tobylǵy sapty qamshysymen shyńnyń búıir tusyn nusqap.

05

Áldeneniń qaraıǵanyn kórip, shý-shýlep jaqyndaı berdik. Jan-jaǵymyzǵa qarap, ań-tańbyz. Áneý bir kınodan kórip qyzyǵatyn Kanada, Norvegııanyń ásem tabıǵaty bizde de bar eken. Tek, tanyta almaı kelemiz. Tanytqandy qoıyp, ózimiz endi-endi tanysyp jatqan joqpyz ba?! Dál osy taýdyń baýraıynda týyp-ósken Dáýlet Áshimhan da, Almas Sarbasov ta, Nurasyl Tileýhan da bul pushpaqqa alǵash aıaq bastyq. Inspektor ǵana, yńyldap án salyp barady.

06

Jetim soqpaqpen qazdaı tizilip baryp ıyqqa shyqqanda, shashylyp temir-tersekter jatty. Aýyr tehnıkanyń tetikterine uqsas. Tastan qalanǵan eki-úsh úıdiń ornyn da baıqadyq. Kenishtiń aýyzyna qaraı janarmaı quıǵan úlken bóshke tur. Sonyń bárine qarasaq, 1970 jyldarǵa deıin dúrkirep turǵan shahta bolǵan sekildi.

07

08

Endigi meje – qarsymyzda qamaldaı bolyp turǵan quzdy asyp ótip, arǵy jaǵyn baıqap qaıtý. Jo-joq, eshkim arǵy jaǵyn kórip qaıt dep tapsyrmaǵan. О́zimizdiń taýǵa, tabıǵatqa degen mahabbatymyz bolsa kerek.

10

Irek soqpaqpen qamaldaı bolǵan quz basyna shyqqanda ras, kók muz eken. Bul jerge jetkende attar da boldyra bastaǵan. Taýtekeniń quzyna, Tór Altaıdyń muzyna tuıaǵy tıigen qarapaıym minis attar jazyqta shapsa, des bere qoımas.

11

– Ákemmen qansha jaılaýdy araladym, dál mundaı qaýipti asýmen júrip kórmeppin, – deıdi Dáýlet Áshimhan attan túse bere.

12

Munartyp Muztaý, jarqyrap Búrkit kórindi. Altaıdyń bul sulýlyǵyn sózben de, fotoapparatpen de jetkize almaspyz. Kózben kórip, seziný kerek. Sony bilemin.

12

...Aman-esen óttik muzdyqtan. Keri osy jolmen qaıtýdy oılasaq, záremiz zár túbine ketedi. Ol qorqynyshty aldymyzdaǵy jazıraly jaılaý umyttyrdy. Jap-jasyl bet, jan-jaǵy tisti shyńdar.

13

Dárilik shópter aıaqtyń astynda jatyr. Shetka shóp, qyzyl tamyr, altyn tamyr degendeı tabıǵı dárilerdiń túr-túri ósedi. Terip alaıyn deseń, Qazaqstannyń Qyzyl kitabyna engen.

14

Shatyr tigildi, shaı qaınady. Jerge jaıylǵan dastarhanǵa dóńgeleı otyryp, jan shaqyrdyq. Bul kezde kún uıasyna batyp bara jatqan.

14

Ertesi qar basqan shyńdardy mańdaıǵa alǵamyz. Jaıaý-jalpy júrmesek, qorym tasta, kók muzda at júre almaıdy. Ábden shaldyqqanda, «mynaý dalaǵa qaı qudaı aıdap keldi» degendeı oılar sanany túrtpektep qoıady.

17

Sharshasaq ta alyp Altaıdy judyryqtaı júregińe syıǵyzyp, sulýlyǵyn kózben kórý – jarty baqyt emes pe?! 

20

Shyǵys Qazaqstan oblysy

Katonqaraǵaı aýdany

Sońǵy jańalyqtar

Taǵy 1677 adamnan koronavırýs anyqtaldy

Koronavırýs • Búgin, 09:40

Qazaqstanda qansha adam vaksına saldyrdy?

Koronavırýs • Búgin, 09:00

9 sý qoımasy salynady

Ekologııa • Keshe

QHL: «Barys» «Lokomotıvten» jeńildi

Hokkeı • 22 Qazan, 2021

Bekire balyǵyn zańsyz aýlaǵandar ustaldy

Ekologııa • 22 Qazan, 2021

Belarýste maska rejımi joıyldy

Álem • 22 Qazan, 2021

Uqsas jańalyqtar