Jansel 2018 jyly Azııa oıyndarynda kúmis medal jeńip aldy. Al Rýslan bolsa, álemdik reıtıngte úzdik 10 myqty sportshynyń qatarynda.
Janseldiń azan shaqyryp qoıǵan aty ‒ Jansáýle. Biraq qujatta Jansel dep qattalǵan. Qyzmet babymen áke-sheshesi Túrkııaǵa kóshken kezde Jansel nebári alty jasta bolatyn. Sporttyń qyr-syryna úırenýdi de Anadoly jerinde bastady.
Jansel aldymen voleıbolǵa qatysty. Sebebi anasy Túrkııada voleıbol komandasynyń dárigeri bolyp qyzmet atqaratyn. Ýaqyt óte kele jerlesimiz Túrkııa chempıonatynda júldegerler qatarynan kórinip, Eýrodaǵy týrnırlerde baq synaıdy. Alaıda komandalyq sport túrinde Olımpıadaǵa qatysý qıyn bolǵandyqtan, Jansel taekvondoǵa bet burǵan. Nege taekvondo? Sebebi onyń bala kezdegi armany Olımpıadada óner kórsetý-tuǵyn. Sol armanyn oryndaý úshin osyndaı qadamǵa barǵan.
2014 jyly Qazaqstannyń sport basshylary habarlasyp, elge kelip qurama atynan halyqaralyq arenaǵa shyǵý jóninde usynys jasaǵanda, Jansel birden kelisken. Otanyn, jerin ańsaǵan qazaq qyzyna óz eliniń týy astynda óner kórsetýden artyq baqyt bar ma?! Mundaı múmkindiktiń bola bermeıtinin bilgen keıipkerimiz, qujatyn daıyndap, 2016 jyldan bastap Qazaqstannyń atynan halyqaralyq jarystarǵa shyǵa bastady.
Nátıje de kóp kúttirgen joq. Ol birden 2016 jyly Rıo Olımpıadasynyń irikteý synyna qatysyp, onda kúmis júldege qol jetkizdi. Sóıtip Olımpıadaǵa qatysý múmkindigine ıe boldy. Osylaısha, armany oryndalyp, Qazaqstannyń Týy astynda Olımpıadaǵa qatysty. Rıodan kelgennen keıin Jansel 2017 jyly jazǵy Ýnıversıada men jazǵy Azııa oıyndarynda kúmis medal enshiledi.
...Mine, Jansel úshin Tokıo dodasy – ekinshi Olımpıada. Rıo Olımpıadasynda tájirıbesiniń azdyǵynan birinshi aınalymda jeńilse, Kúnshyǵys elinde ol sheberliginiń shyńdalǵanyn, tájirıbesiniń tolysqanyn kórsetpekshi. 67 kılodan joǵary salmaqta synǵa túsetin Janseldiń alǵashqy qarsylasy О́zbekstan ókili Svetlana Osıpova bolmaq. Jansel- Jansáýleniń juldyzy jarqyn bolyp, Qazaq eliniń Ánuranyn shyrqatsyn dep tileıik.
