Tikushaqpen tekserý barysynda Almaty ákimi Baqytjan Saǵyntaev taýdaǵy qaýipsizdikti, taý lashyqtaryn, baqylaý-qutqarý pýnktin, Tuıyq-Sý alpınıstik lagerinde tikushaq alańyn jasaý jobasymen tanysty. Sonymen qatar, Tótenshe jaǵdaılar departamentine «Qazseldenqorǵaý» MM-niń aýmaqtyq bólimshesiniń mamandarymen birge megapolıs jáne qala turǵyndarynyń sel qaýipsizdigin qamtamasyz etý jónindegi is-sharalar keshenin júzege asyrýdy jalǵastyrýdy tapsyrdy.
Tekserý jumystaryna «Qazseldenqorǵaý» MM-niń tóraǵasy K.Kókirekbaev, qalalyq TJD-niń basshylyǵy men mamandary qatysty. Mamandar morendi kólderdiń, sondaı-aq Aqsaı, Qarǵaly jáne Úlken Almaty ózenderi basseıniniń jaǵdaıyn saraptady.
Jalpy, Almaty mańynda 45 muzdy kól bar, onyń jeteýinde bıyl qaýiptiń aldyn alý jumystary júrgizilýde. Temperatýra rejiminiń kóterilýine baılanysty muzdyqtar erip jatyr. Qazirgi kezde jeti kóldegi sýdyń jalpy kólemi 1 mıllıon tekshe metrdi quraıdy, ıaǵnı qaýipsiz. Sel qaýpi bastalǵan maýsymnan beri 1,6 mln tekshe metr sý aǵyzylǵan.
Morendi kólderdiń jaǵdaıy 9 turaqty jáne 10 maýsymdyq gıdrobeketterde baqylanady. Olar turǵyn jaı modýlderimen, tirshilikke qajet jabdyqtarmen jáne baılanys quraldarymen qamtamasyz etilgen.
Búginde B.Saǵyntaevtyń tapsyrmasy boıynsha qalanyń sel qaýipsizdigin qamtamasyz etý máselesi júıeli túrde sheshilýde. Máselen, Aqsaı men Úlken Almaty ózenderiniń basseıninde eki sel bógetiniń qurylysy bastaldy. Bul gıdrotehnıkalyq qurylystar 3 myńǵa jýyq nysandy jáne 40 myńnan astam qala turǵynyn qorǵaýdy qamtamasyz etedi.
Sonymen qatar, qalalyq TJD sel qaýpin baqylaýdyń avtomattandyrylǵan júıesin engizý jobasyn jasap jatyr. Birinshi kezeńde Úlken jáne Kishi Almaty ózenderine 10 stansa ornatyldy. Taǵy 21 stansa ekinshi kezeńde qoıylady. Júıe boıynsha taýly ózenderdegi jaǵdaıǵa 10 parametrge deıin avtomatty túrde monıtorıng júrgiziledi, onyń ishinde sý deńgeıi, aýa men sý temperatýrasy, topyraq ylǵaldylyǵy, jaýyn-shashyn qarqyndylyǵy jáne sel júrý qaýpi anyqtalady.
