Atalǵan toptamany ázirleý baǵytyndaǵy keshendi sharalar ótken jyldyń qyrkúıek aıynda bastalǵan. Mundaǵy negizgi maqsat – oqýlyqtarǵa qoıylatyn talaptardy otandyq jáne álemdik tájirıbeni salystyrý jáne jiti zertteý arqyly qaıta qarastyrý, zaman talabyna saı ázirleý. Sondaı-aq, saraptama kezeńderi men rettiligin tıimdilik jáne qoldanbalylyq turǵysynan qaıta qaraý, oqýlyqtardy zerdeleý men bekitýdiń ulttyq júıesin nyǵaıtý kózdeldi. Bul jóninde RǴP Bilim mazmunyn saraptaý ortalyǵynyń dırektory Eldos Nurlanov aıtyp berdi.
«Ázirlengen qujattarda saraptamany júrgizýge, sarapshylardy irikteýge, orta bilim mazmunynyń ınvarıantty bóligine jatatyn 19 pánge arnalǵan krıterıılerge, jańa oqýlyqtar men OÁK-ge júrgiziletin synaqtan ótkizý prosesi men qoǵamdyq talqylaý jumysyn júrgizýge qatysty nusqaýlyqtar qamtylǵan. Sonymen qatar oqý basylymdarynyń avtorlaryna, sarapshylardyń jumysyn baǵalaýǵa baǵyttalǵan arnaıy nusqaýlyqtar da bar», dedi ortalyq basshysy.
Eldos Bolathanulynyń aıtýynsha, oqý ádebıetin baǵalaýǵa arnalǵan krıterıılerdi 19 pánge bólip qarastyrý – utymdy tájirıbe. Buǵan deıin oqý basylymdaryn baǵalaý júıesinde jalpy talaptarǵa basymdyq berilgen. Elimizde oqýlyqqa saraptama júrgizýdiń ózindik tájirıbesi bolǵanymen, pán boıynsha egjeı-tegjeı jikteý buryn-sońdy qoldanylyp kórmegen.
Bilim jáne ǵylym mınıstrligi bul máselege den qoıyp, Dúnıejúzilik banktiń «Orta bilimdi jańǵyrtý» jobasy aıasynda osy baǵyt boıynsha konsýltasııalyq, ǵylymı-zertteý jumystardy júrgizýdi qolǵa aldy.
Jańartylǵan krıterıılerde sońǵy 5 jylda qoldanysy qarqyndy túrde artqan ǵalam toraby men áleýmettik jeliniń syn-qaterleri eskerilgen. Máselen, memleket pen qoǵamnyń damýyna keri áserin tıgizýi múmkin kemsitýshilik, quqyqbuzýshylyq, qatygezdik, úrdisshildik, sýısıd, lańkestik, otbasy qundylyqtaryna qarsy minez-qulyq, kommersııalyq jarnama, beıresmı derekkózderdiń kórinis tabýyna jol bermeý máselesi kúsheıtile túsken.
Jańartylǵan krıterııler tıisti rásimderden ótkennen keıin qoldanysqa engiziledi.
