«Qazaqstan muǵalimine» – 1 mln dollar

Atalǵan jobaǵa bastamashy bolyp otyrǵan – Qoǵamdyq mańyzdy jobalardy damytý qory. Al Samruk-Kazyna Trust áleýmettik jobalardy damytý qory «Samuryq-Qazyna» AQ kompanııalar tobynyń atynan bas seriktes retinde bastamaǵa qoldaý kórsetpek.

Qoǵamdyq mańyzy bar bastamalardy damytý qorynyń tóraǵasy Ermek Májıtov:

– «Álem muǵalimi» jahandyq syılyǵy – 1 mln dollarlyq júlde qory bar Nobel syılyǵynyń balamasy. 2019 jyly Qoǵamdyq mańyzy bar bastamalardy damytý qorynyń quryltaıshysy Álııa Nazarbaevanyń bastamasymen jahandyq syılyqtyń uıymdastyrýshylarymen memorandýmǵa qol qoıyldy, onyń aıasynda «Qazaqstan muǵalimi» ulttyq jobasy usynyldy. Joba pedagogter eńbeginiń bedelin, mártebesin arttyrý, sondaı-aq jahandyq deńgeıge shyǵarýdy kózdeıdi. Bizdiń ustazdarymyz álemdik syılyqtarǵa, dúnıejúzilik deńgeıde tanylýǵa laıyqty. Muǵalimderden ótinimderdi qabyldaý sáýir aıynan 15 tamyzǵa deıin jalǵasady. Árbir muǵalim osy jobaǵa óz betinshe qatysa alady, óz ótinimderin mektep ákimshiliginiń sheshiminsiz nemese qatysýynsyz, bólim nemese bilim basqarmasy nemese Bilim mınıstrligi tarapynan berilgen usynymdarsyz bere alady. Iаǵnı ár muǵalim teń jaǵdaıda qatysa alady, – dedi.

Spıker E.Májıtovtiń málimdeýinshe, táýelsiz sýdıalar Akademııasynyń kómegimen top-50 muǵalim iriktelip alynady, sodan keıin 10 fınalıst anyqtalady, olar 24 qyrkúıekte Almaty qalasynda ótetin marapattaý rásimine shaqyrylady. Jeńimpazdar men 10 fınalıst «Álem muǵalimi 2022» jahandyq syılyǵynyń nomınanty atanady.

Azamattyq bastamalardy qoldaý ortalyǵynyń Bas­qarma tóraǵasy Lıma Dıas «Qazaqstan muǵalimi 2021» ult­tyq syılyǵy aıasynda úkimettik emes uıymdarǵa 30 shaǵyn grant (árqaısysy 1,2 mln teńge mólsherinde) usynatynyn jetkizdi.

– Bizdiń basty mıssııamyz – azamattyq qoǵamdy da­mytýǵa járdemdesý. 2016 jyly qurylǵan sátten bas­tap Ortalyq túrli áleýmettik baǵyttar boıynsha 300-den asa granttyq jobalardy iske asyrdy, onyń ishinde bilim berý salasyna qatysty áleýmettik jobalar da bar. «Qazaqstan muǵalimi» ulttyq syılyǵyn ótkizý sheńberinde barlyq múddeli taraptarǵa bilim berý prosesteri men óskeleń urpaqty tárbıeleýdegi áleýmettik mańyzy bar problemalardy anyqtaýǵa, ony sheshýdiń joldaryn pedagogterdiń tikeleı qatysýymen ázirleýge múmkindik beriledi. Pedagogıkalyq qoǵamdastyq pen azamattyq qoǵamnyń, ıaǵnı úkimettik emes uıymdardyń birlesken tıimdi jumysy bolmasa, mundaı máselelerdi tolyqqandy sheshý múmkin emes. Osyǵan baılanysty jańa ıdeıalar men bastamalardyń serpinin ilgeriletý maqsatynda Ortalyq Samruk Kazyna Trust áleýmettik jobalardy damytý qory men Qoǵamdyq mańyzy bar bastamalardy damytý qorynyń qoldaýymen úkimettik emes uıymdarǵa 30 shaǵyn grant (árqaısysy 1,2 mln teńge mólsherinde) usynady, – dedi L.Dıas.

Ortalyq ókiliniń aıtýynsha, shaǵyn granttar jobaǵa qatysýshy muǵalimderdiń bilim berý prosesin, oqytý jaǵdaılaryn jaqsartý jáne eldiń shalǵaı aýdandaryndaǵy aýyldyq mektepterdegi oqýshylardyń bilimin jan-jaqty damytý jónindegi bastamalaryn iske asyrýǵa baǵyttalady. Shaǵyn granttardy 2021 jyldyń qyrkúıek-jeltoqsan aralyǵynda júzege asyrý josparlanýda. Operator retinde Ortalyq shaǵyn granttar berý úshin ÚEU arasynda konkýrs ótkizedi, sondaı-aq jobaǵa qatysýshy pedagogtermen birlesip granttardyń iske asyrylýyna monıtorıng júrgizedi. Jobalardyń iske asyrylý barysy Ortalyqtyń ınternet-resýrstarynda jarııalanyp, nátıjeleri qory­tyn­dy eseptik is-sharada usynylady.

Bilim jáne ǵylym mınıstrligi janyndaǵy Mektepke deıingi jáne orta bilim berý komıteti tóraǵasynyń orynbasary Jomart Qarambaev «Qazaqstan muǵalimi» ulttyq baıqaýynyń ótkizilýi vedomstvo tarapynan qoldaýǵa ıe bolyp otyrǵanyn jetkizdi.

– Mınıstrlik konkýrstyń barlyq kezeńin uıym­das­tyrýǵa jáne ótkizýge qoldaý kórsetedi, sondaı-aq konkýrstyń saltanatty jabylý rásimine vedomstvo ókilderi qatysady. Qazirgi kezde barlyq bilim berý uıymy osy konkýrs týraly pedagogter arasynda túsindirý ju­mystaryn júrgizip jatyr, – dedi ol.

Eske sala keteıik, baıqaýǵa qatysý úshin www.teacherprize.kz saı­ty­na kirip, ótinim berý kerek.