Oblystyq densaýlyq saqtaý basqarmasy baspasóz qyzmetiniń málimetinshe, Altyn Tólegenova maýsym aıynyń basynda Inder aýdandyq aýrýhanasyna jatqyzylǵan. Jaǵdaıy nasharlaǵan soń Atyraý qalasyndaǵy modýldik aýrýhananyń jansaqtaý bólimine aýystyrylypty.
«Jansaqtaý bóliminde kelgende eki jaqty pnevmonııa, ókpeniń 96% qabynýy degen dıagnoz qoıyldy. Bir aı boıy ókpeni jasandy jeldetý apparatyna qosýly jattym. Dárigerlerdiń kúsh-jigeriniń nátıjesinde qaýipti vırýstan aman qaldym. Meni beıindi bólimsheniń palatasyna aýystyryp, emdelýdi jalǵastyrdym» deıdi Altyn Tólegenova.
Búgin, 10 tamyzda ol modýldik aýrýhananyń ınfeksııalyq stasıonarynan shyǵaryldy. Endi úsh aı boıy turǵylyqty meken-jaıy boıynsha dárigerlerdiń baqylaýynda bolady. Sondaı-aq, arnaıy ońaltýdan ótedi.
«Men 10 kún boıy ottegi konsentratorynyń kómegimen dem alamyn. Sodan keıin dárigerlerdiń baqylaýymen ókpeniń jumysyn qalpyna keltiremin. Osy oraıda emdelý kezinde dárigerlerge kórsetken qamqorlyǵy men jyly sózi úshin alǵysymdy bildirgim keledi. Al, turǵyndardan týǵan-týystaryńyz ben jaqyndaryńyzdyń qaýipsizdigi úshin betperde kıip, adamdar kóp jınalatyn oryndarǵa barmaýdy suraımyn» deıdi Altyn Tólegenova.
