«Klımattyń ózgerýi – jahandyq jylynýdyń saldary. Aýa raıynyń qazirgi qurǵaqshylyq sııaqty kataklızmderi kútildi, sáıkesinshe, bizdiń daıyn bolýymyz kerek edi. Alaıda osy jaǵdaı daıyn bolmaǵanymyzdy kórsetti», dedi Erbol Qarashókeev OKQ brıfınginde.
Onyń aıtýynsha, elimizde jyl saıyn zootehnıkalyq talaptan eki ese az jem óndiriledi. Jalpy kólemniń 70%-ǵa jýyǵy negizinen tabıǵı shabyndyqta jınalady. Al olardyń ónimdiligi tikeleı aýa raıyna baılanysty.
«Elimizde aýyspaly egistiktegi jem-shóp daqyldarynyń úlesi 15% deńgeıinde, bul ǵylym usynǵan kórsetkishten eki ese tómen. Osylaısha, mal sharýashylyǵyn damytýdyń negizgi prınsıpteri buzyldy dep aıtýǵa bolady. Mal basyn kóbeıtý kezinde jem-shóp qory eskerilmegen», dedi mınıstrdiń m.a Erbol Qarashókeev
Ol Mańǵystaý men Qyzylorda oblystarynyń qazirgi jaǵdaıyna da osy faktor áser etýi múmkin ekenin atap ótti.
«Mańǵystaý oblysyn alaıyq. Statıstıkalyq málimetterge súıensek, bul jerde keńes zamanynda 732 myńǵa jýyq mal basy bolǵan. Olarǵa arnalǵan jalpy uzyndyǵy 60 km bolatyn 3400 qubyrly qudyq, 43 toǵan men sý qubyry bolǵan. Memleket arqyly jaıylymdyq jerlerdi jaqsartý sharalary júzege asyrylyp, ónimdiligin saqtap qaldy. Qazir oblysta 840 myńǵa jýyq mal bar, olardyń jalpy sany 15%-ǵa jýyq ósti. 2014 jyldan 2020 jylǵa deıin 400-ge jýyq uńǵyma salyndy jáne qalpyna keltirildi», dep túsindirdi Qarashókeev.
Buǵan deıin Erbol Qarashókeev halyqqa úndeý jasap, qurǵaqshylyq pen jem-shóptiń jetispeýshiliginen maldyń jappaı qyrylýy oryn alǵan Mańǵystaý oblysynyń sharýalaryna kómek berýdi surady. AShM qyzmetkerleri bir kúndik jalaqysyn muqtaj fermerlerge kómek retinde aýdardy.
