Oblystyq jastar saıasaty máseleleri jónindegi basqarmanyń málimetine qaraǵanda, búginde «Jasyl el» jasaqtarynyń quramynda joǵary oqý ornynyń 217 stýdenti, kásiptik tehnıkalyq bilim berý ortalyqtarynyń 304 stýdenti, 245 mektep oqýshysy, 178 jumyssyz jas bar eken. Al bıyl shtab jumysyn úılestirýge jergilikti bıýdjetten 151,6 mln teńgege jýyq qarjy bólingen bolatyn.
Sonymen ótken bir aı ishinde oblys boıynsha jastar «Jasyl baq – taza qala», «Taza ózen – taza jaǵalaý», «Jaıqalsyn jas terek», «Ekodesant» aksııalaryn ótkizip, ekologııalyq tazartý sharalaryn atqarsa, «Armysyń, Ardager», «Úlkenge qurmet – kishige mindet» atty qamqorlyq aksııalary kezinde qarttarǵa jádem kórsetti. Jalpy, shilde aıynda jastardyń qatysýymen oblys boıynsha 156 km aryq tazartylyp, 301 ga jerdiń shóbi shabylǵan, 176 ga jer qaldyqtan tazartylyp, qoqysy shyǵarylǵan.
Qoqys demekshi, jaqynda Taldyqorǵan qalasyndaǵy «Avangard» bastaýysh partııa uıym tóraǵasy Ǵazız Amanjoluly qaldyqty suryptap, qaıta óńdeýge qatysty bastama kóterdi. «Nurotandyq» jas belsendi ózi turatyn kópqabatty úı turǵyndaryn bastamaǵa qosylýǵa shaqyryp, sellofan, qaǵaz, metall, turmystyq qaldyqtar jáne plastık buıymdaryn aýladaǵy qoqys bóshkesine bólek suryptap, salýdy bastady. Jáne búkil qala turǵyndaryn óziniń isinen úlgi alýǵa shaqyrady. Esesine, suryptalǵan qoqys-shıkizatty qabyldap alýshy kompanııalarǵa ótkizip, túsken qarjyny qaıyrymdylyq qorlaryna ótkizýge bolady eken.
«О́kinishke qaraı, adamdardyń qoqysty suryptaý mádenıeti áli de shyndyqtan alshaqtaý bolyp tur, kerisinshe qoqysty sellofanǵa salyp tastaı salý nemese jolda ketip baryp, kez kelgen jerge laqtyra salý syndy jaǵdaılar kóp kezdesedi. Al biz «Taza bolsa tabıǵat – aman bolar adamzat» degen urandy ustaı kele, adamzat balasyn tabıǵatty taza ustaý árqaısymyzdyń mindetimiz dep esepteımiz, sol úshin ózimiz birinshi bolyp úlgi kórsetýimiz kerek», deıdi Nur Otan partııasy Taldyqorǵan qalalyq fılıaly «Avangard» bastaýysh uıymynyń basshysy Ǵazız Amanjoluly.
Aıtpaqshy, aımaqta stýdenttik qurylys jasaqtarynyń qyzmeti qaıta jandana bastady. Búginde oblys kólemindegi qurylys jumystarynda osyndaı otrıad quramyndaǵy 211 jas jumys istep júrgen kórinedi. Sondaı-aq oblys aýmaǵyndaǵy qurylystyń jandanýy qajetti materıaldardy óndirýge degen qulshynysty oıatyp otyr.
Mysalǵa, bıyl jetisýlyq 28 jastaǵy jas kásipker úı salýǵa qajetti gazdy bloktar shyǵaratyn ekinshi shaǵyn zaýytyn ashty. Isker azamat Ermek Suńqarbekuly alǵashqy zaýytty ótken jyly Talǵar aýdanynda iske qosqan eken. 3 gektar aýmaqta óndiristik seh, qoıma jaılary, uńǵyma, ónimder satylatyn shaǵyn dúken ornalasqan. О́nimge suranys artyp, kórshiles aýdandardan tapsyrys túse bastaǵan. Sondyqtan kásipker ekinshi sehty iske qosypty. Ol osy jyldyń mamyr aıynda Boraldaı aýylynda ashyldy. Jalpy aýdany 1 gektar bolatyn jerge qajetti qondyrǵylaryn ornalalastyrdy. Búginde kún saıyn zaýyttarda 50 sharshy metrden astam tas tósenishter, 240 dana gazdy blok jáne 1200 prıtorlyq blok shyǵarylýda. Ermektiń eki kásiporynda barlyǵy 17 adam jumys isteıdi eken.
