Aımaqtar • 16 Tamyz, 2021

Toı tyıylmaı, indet juqtyrýshylar azaımaıdy

2023 ret kórsetildi

Búginde álemdi ábigerge salyp otyrǵan koronavırýs indetimen kúres meılinshe qarqyndy júrgizilýde. Elimizde de tıisti sharalar qabyldanyp, júzege asyrylýda. Jambyl oblysynda karantın talaptary engizilip, monıtorıngtik top músheleri kúndelikti baqylaý júrgizýde.

Degenmen óńirde karantın talaptaryn qasaqana buzý tyıylmaı tur. Ásirese meıramhanalarda toı jasaý, túrli otbasylyq sharalar ótkizý sııaqty jıyndar kún saıyn jalǵasýda. О́zge túgil, óziniń de qamyn oılamaǵan qarapaıym halyq ta, meıramhana ıeleri de karantınge kóz jumyp qarap otyr.

Búginde Jambyl oblysynda qaýipti indetti juqtyrýdyń deregi kún sanap artyp barady. О́kinishke qaraı, koronavırýstan kóz jumǵandar da bar. Oblys bo­ıynsha sanıtarlyq-epıdemııalyq baqylaý departamenti basshysynyń oryn­basary Baǵlan Qydyrbaevtyń aıtýynsha, qazirgi kezde óńirde 2 259 naý­qas aýrýhanaǵa jatqyzylyp, aımaq­ta aýrýhanalardyń tósektik orynmen qam­tylýy 63 paıyzdy quraǵan. Sonymen qatar ol aýrýdyń joǵary deńgeıi oblys­tyń barlyq qalalary men aýdandarynda da baıqalatynyn atap ótti.

«Bıyl 1 qańtardan bastap mo­nı­to­rıngtik toptar músheleri tıisti tár­tipti saqtamaǵan 836 nysandy anyqta­dy. Nysandardyń basshylaryna túsin­dirý jumystary júrgizildi, eskertýler berildi. Tekserý materıaldary men monıtorıngtik toptardyń sanıtarlyq-epıdemııalyq qyzmetke bergen materıaldary negizinde 83 mln teńgeden asa somaǵa 705 aıyppul salyndy», deıdi B.Qydyrbaev.

Búginge deıin Jambyl oblysynyń 71 kásipkerlik nysanynda karantındik sharalardy qasaqana buzý faktileri anyqtalǵan. Tekserý nátıjeleri boıynsha jalpy kólemi 59 mln teńgeden asatyn aıyppul salý arqyly 262 tulǵa ákimshilik jaýapkershilikke tartylǵan. Negizgi quqyq buzýshy nysandardyń sandyq statıstıkasy da belgili. Olardyń qatarynda 64 qoǵamdyq tamaqtaný orny, ıaǵnı meıramhanalar, kafeler, banket zaldary, kafe-barlar bar. Sondaı-aq 3 kompıýterlik klýb, 2 saýda nysany, 1 loto klýby jáne 1 balalar oıyn-saýyq ortalyǵy da «qara» tizimde.

Qazirgi kezde qaýipti indettiń órshýi birqatar aýdanmen qatar, Taraz qalasynda da baıqalady. Oblys ortalyǵynda jyl basynan beri 10 143 jaǵdaı tirkelgen. Tipti osy jyldyń shilde, tamyz aılarynda koronavırýs juqtyrýdyń deregi aldyńǵy aılarmen salystyrǵanda arta túsken. Búgingi tańda Taraz qalasynda naýqas azamattardy emdeýge arnalǵan 4 ınfeksııalyq stasıonar jumys isteıdi. Qazir ınfeksııalyq stasıonarlarda 1 434 naýqas em qabyldaýda.

Taraz qalasy ákiminiń orynbasary Almas Sadýbaevtyń aıtýynsha, ákimdik tarapynan qurylǵan monıtorıngtik top qalada ornalasqan kásipkerlik sýbek­tilerine kúndelikti reıdter júr­gizýde. Karantındik shekteý sharalary bastalǵannan beri 473 ákimshilik-quqyq buzýshylyq týraly hattama toltyrylyp, kásipkerlerge 91 mln 213 myń 815 teńge kóleminde aıyppul salynǵan. Al bıyldyń ózinde 288 ákimshilik-quqyq buzýshylyq týraly hattama toltyrylyp, 49 mln 318 myń 575 teńge aıyppul salynǵan. Sondaı-aq 21 talap-aryz materıaly birqatar nysannyń qyzmetin toqtatý úshin aýdanaralyq ekonomıkalyq sotqa jiberilgen. Nátıjesinde, 15 ny­san­ǵa qatysty sheshim shyqsa, 4 is-qu­jat qaraýsyz qaldyrylyp, 2 is-qu­jat­ty qaraý toqtatylǵan. Qazirgi kezde oblys ortalyǵynda ornalasqan 15 nysan óz jumysyn toqtatyp otyr.

Qaıtken kúnde de qaýipti indet boı beretin emes. Koronavırýs kún saıyn kúsh alýda. Saqtyq sharalaryn meılinshe saqtaý kerek degenmen, bul oryndalmaı otyr. Osyǵan baılanysty qazirgi tańda óńirdegi mobıldik toptardyń jumysy kúsheıtilgen. Tamyz aıy bastalǵaly beri 73 hattamalyq akti toltyrylǵan. Reıd júrgizý barysynda Taraz qalasyndaǵy Taraz Hall, Imperial, Grand Royal jáne Zaravshan meıramhanalarynda bir kúnde 3 toı ótkizilgendikten, olarǵa da jeke-jeke hattamalyq akti toltyrylǵan. Taraz qalasy ákimdiginiń bergen málimetinde «Monıtorıngtik toptardyń jumysy kúsheıtildi. Osylaısha, 31 shildede Tarazda 25 toı toqtatylyp, hattama toltyryldy. Aıta keterligi, turǵyndar óz is-sharalarynyń shyrqyn buzbaý, toqtatpaý úshin túrli áreketterge barady. Qarsylyq kórsetedi. Tipti top múshelerine beıádep sózder aıtyp, qol kóterý, qoqan-loqy kórsetý jaǵdaılary da bolǵan. Oǵan qatysty monıtorıngtik top músheleri tarapynan quqyq qorǵaý organdaryna aryz túsip, sottyń sheshimi de shyqty», delingen.

Kúndelikti reıdtik jumystardyń máli­metterin qarap otyrsaq, oblys or­ta­­lyǵynda toı-jıynǵa áli de toq­tam bolmaı otyrǵanyn kóremiz. Bul birin­shi­den meıramhana ıeleriniń tártipke baǵynbaı otyrǵanyn kórsetse, ekinshiden kópshiliktiń de talapqa kóndikkisi kel­me­ge­nin bildiredi. Jýyrda ǵana áleýmettik jelilerde «Aı juldyz» meıramhanasyna toıdy toqtatý úshin monıtorıngtik top músheleriniń barǵany, alaıda olardyń bul talapqa kónbegeni, keıinnen top músheleri áriptesterin kómekke shaqyrǵany, sol úshin top músheleriniń zábir kórgeni, ony kóre tura ákimdik qyzmetkerleriniń eshqandaı áreket jasamaǵany týraly jarııalanǵan bolatyn.

Atalǵan oqıǵanyń anyq-qanyǵyn bilmek maqsatta Taraz qalalyq ákimdigine habarlasyp, tıisti jaýapty aldyq. Shahar ákimshiligi bergen aqparatta «1 tamyz kúngi reıdtik jumystar barysynda qala aýmaǵynda barlyǵy 13 kásipkerlik nysanǵa akti toltyryldy. «Aı juldyz» meıramhanasyna №2 monıtorıngtik top kezekti reıdke shyqqan. Toı ıeleriniń toıdy toqtatýǵa qarsylyq bildirip, qaý­ly­ny oryndaýdan bas tartýyna baılanysty top músheleri óz áriptesterin kómekke shaqyrǵan. Osy kezde basqa meıramhanada túsindirý jumystarymen júrgen ákimdik qyzmetkerleri «Aı juldyz» meıramhanasyna baryp, toı toqtatylady. Karantın talaptaryn saqtamaı, otbasylyq is-shara júrgizgen «Aı juldyz» meıramhanasyna №2 mobıldi top músheleri S.Sultanov pen N.Amanmurattyń tarapynan hattamalyq akti toltyrylǵan. Aktige meıramhana qojaıyny Z.Tamtybaev tanystym dep qol qoıyp bergen. Meıramhanaǵa ákimdik qyzmetkerleri kelgen ýaqytta monıtorıngtik top múshelerine qatysty qoqan-loqy kórsetý is-áreketi oryn almaǵan. Monıtorıngtik top músheleri tarapynan quqyq qorǵaý organdaryna aryz túspedi», delingen. Munyń aldynda da toıdy toqtatý úshin barǵan oblys ákiminiń orynbasary Dáýlet Káribek bastaǵan monıtorıngtik top músheleri qarsylyqqa ushyraǵan bolatyn. Kún saıyn hattama toltyrylyp, tártip buz­ǵan­darǵa aıyppul salynǵanymen, toı-jıyndy toqtatý qıynǵa soǵyp tur. Osy ýaqytqa deıin Taraz qalasynyń ózinde 25 toıdyń toqtatylǵany, birqatar meı­ramhananyń bir kúnde úsh ret toı ótkizgeni týraly sııaqty jaǵdaılar bol­ǵan edi. Al jergilikti bıliktiń toı ótkizýdi tolyq toqtatýǵa shamasy kelmeı otyr.

Sońǵy jańalyqtar

Shymkentte taǵy bir aýdan qurylady

Qoǵam • Búgin, 16:58

Almatyda qant qymbattap barady

Qoǵam • Búgin, 16:45

Dollar baǵamy ósti

Qarjy • Búgin, 16:12

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Uqsas jańalyqtar