«Sinopharm kompanııasynyń Vero Cell vaksınasy endi shymkenttikterge qoljetimdi. Qalaǵa jetkizilgen 40 myń doza ekpe emhanalarǵa úlestirilip berildi. Vero Cell vaksınasy álemniń 45 elinde, sonyń ishinde Qytaı, Birikken Arab Ámirlikteri, Túrkııa, Serbııa, Belarýs, Bahreın jáne basqa elderde sátti qoldanylady. Dúnıejúzilik densaýlyq saqtaý uıymy Vero Cell vaksınasyn osy jyldyń 7 mamyrynan bastap paıdalanýǵa maquldady», dep habarlady basqarma basshysy.
Qalanyń bas dárigeri bul vaksınanyń ereksheligin de atap ótti. Onyń aıtýynsha, vaksınany saqtaýda qatań talaptardyń bolmaýy resýrs jetispeýshiligi jaǵdaıynda óte yńǵaıly. Bul álemdegi ampýlasy arnaıy monıtormen qamtamasyz etilgen alǵashqy vaksına. Atalǵan monıtor japsyrma vaksınany jyly ortaǵa salǵan kezde túsin ózgertedi, bul medısına qyzmetkerlerine ony paıdalaný kezinde qaýipsizdik talaptarynyń saqtaýǵa múmkindik beredi.
Qazir qalada bes túrli vaksına bar. Olar: Qaraǵandy qalasynda shyǵarylatyn reseılik «Spýtnık V», qazaqstandyq QazVac, BAÁ elinde daıyndalǵan Sinopharm kompanııasynyń HayatVax ekpesi, Qytaıdyń Sinovac Biotech kompanııasy jasap shyǵarǵan Coronavac jáne Sinopharm kompanııasynyń Vero Cell vaksınasy.
«Qurmetti qala turǵyndary, vaksınasııa koronavırýsqa qarsy qorǵanystyń jalǵyz ári tıimdi ádisi. Solaı ǵana biz qalypty ómirimizge orala alamyz», dep jazady Shymkent qalasy ákimdiginiń baspasóz qyzmeti.
