Kelissóz barysynda qos tarap saýda-ekonomıka, ónerkásiptik kooperasııa, kólik-logıstıka, energetıka jáne basqa da salalardaǵy yntymaqtastyqty odan ári arttyrý máselelerin talqylady.
Osy jyly elder arasyndaǵy saýda-ekonomıkalyq yntymaqtastyq serpini birtindep qalpyna keltirilýde. Bıylǵy qańtar-maýsym aılarynda ekijaqty taýar aınalymy $10,7 mlrd qurady, bul 2020 jyldyń sáıkes kezeńindegi kórsetkishten 27%-ǵa joǵary. Qazirgi dınamıka saqtalǵan jaǵdaıda, eki el arasyndaǵy saýda kólemi bıyl $23 mlrd-tan asady dep kútilýde.
Qazaqstanda Reseıdiń qatysýymen 7791 kásiporyn jáne 3325 Qazaqstan-Reseı birlesken kásiporyndary jumys isteıdi. Reseılik kompanııalar QR ekonomıkasyna salynǵan qarajat kólemi boıynsha basty ınvestorlardyń bestigine kiredi. Sońǵy 10 jylda Reseı Qazaqstanǵa shamamen $12,6 mlrd ınvestısııa saldy. Reseılik kompanııalardyń ınvestısııalyq portfeli árbir salada kezdesedi. Jalpy somasy $5,3 mlrd quraıtyn, ónerkásiptik kooperasııa, saýda, qurylys ındýstrııasy, farmasevtıka, munaı-hımııa jáne jeńil ónerkásip salalaryndaǵy 30 birlesken iri joba iske asyrý jáne pysyqtaý satysynda tur.
Aǵymdaǵy jyldyń 6 aıynda Qazaqstan men Reseı arqyly Ortalyq Azııa, Eýropa, Qıyr shyǵys baǵyttarynda barlyǵy 406,5 myń JFE tasymaldandy, bul 2020 jyldyń sáıkes kezeńindegiden 48%-ǵa artyq. Qazaqstan aýmaǵy arqyly konteınerlik tasymaldar kólemi 326,2 myń JFE (+58%) qurady.
Kelissóz qorytyndysy boıynsha eki eldiń úkimet basshylarynyń qatysýymen kelesi qujattarǵa qol qoıyldy:
- Shyǵys Tarýtın (Qazaqstan Respýblıkasy), Tarýtın (Reseı Federasııasy) ken oryndarynda mys (mys-altyn) kenderin óndirý kezinde shekara mańyndaǵy aýmaqta sharýashylyq qyzmetti júzege asyrý erekshelikteri týraly úkimetaralyq kelisim;
- AHFO men Tatarstan Respýblıkasy arasyndaǵy yntymaqtastyq jónindegi is-sharalar jospary;
- QR Strategııalyq josparlaý jáne reformalar jónindegi agenttigi, AHQO, «Skolkovo» Máskeý basqarý mektebi arasyndaǵy turaqty damý strategııalary jónindegi yntymaqtastyq týraly memorandým;
- «Bashqurt soda kompanııasy» AQ men «Kaýstık» AQ arasyndaǵy yntymaqtastyq týraly bas kelisim; qaǵazsyz tehnologııa boıynsha «RTJ» AAQ jáne «QTJ» UK» AQ/ «QTJ-JT» JShS qatysýymen júkter men vagondardy tasymaldaýǵa kóshýdi jandandyrý jónindegi jol kartasy;
- «QTJ» UK» AQ men «RTJ» AAQ arasyndaǵy temir jol kóligimen agroónerkásiptik ónimderdi tasymaldaýdy uıymdastyrý salasyndaǵy yntymaqtastyq týraly memorandým.
QR Premer-Mınıstri A. Mamın men RF Úkimetiniń Tóraǵasy M. Mıshýstın Qazaqstan Úkimetiniń Sıfrlyq keńsesiniń jumysymen, halyq pen kásipkerlik sýbektilerine memlekettik qyzmetterdi sıfrlandyrý salasynda iske asyrylyp jatqan jobalarmen, sondaı-aq AHQO qyzmetimen tanysty.
