Jalpy sany 100-ge jýyq adam bolatyn Birikken Ulttar Uıymynyń Aýǵanstanǵa járdemdesý boıynsha mıssııasy (MOONSA), sondaı-aq BUU agenttikteri, qorlary men baǵdarlamalarynyń halyqaralyq qyzmetkerleri Almatyda ýaqytsha keńse qurady dep josparlanǵan.
Bul shara BUU-ǵa Aýǵanstan halqyna barynsha az qaýip-qatermen ómirlik mańyzdy kómek kórsetýdi jalǵastyrýǵa múmkindik beredi, sonymen birge BUU qyzmetkerlerine tónetin qaýipti azaıtady. Jaǵdaı birqalypty bolǵannan keıin qyzmetkerler Aýǵanstanǵa oralady.
BUU aýǵan halqyna qıyn ýaqytta qoldaý kórsetýge mindetteledi. Gýmanıtarlyq qyzmetkerlerdiń kópshiligi mıllıondaǵan muqtaj janǵa ómirlik mańyzy bar kómek berý úshin Aýǵanstanda qalady.
Almaty qalasyndaǵy ýaqytsha keńse Aýǵanstandaǵy qaýipsizdik jaǵdaıyna baılanysty Aýǵanstanda jáne odan tys jerlerdegi BUU qyzmetkerleriniń ýaqytsha rotasııa ortalyǵy retinde bola alady.
«Birikken Ulttar Uıymy Qazaqstan Úkimetine MOONSA-nyń qashyqtaǵy keńsesin ornalastyrýǵa bergen kelisimi úshin, sondaı-aq keshe Birikken Ulttar Uıymynyń Aýǵanstanǵa járdemdesý boıynsha mıssııasynyń alǵashqy qyzmetkerlerin Almatyda qarsy alý kezindegi tamasha yntymaqtastyǵy men qoldaýy úshin úlken rızashylyǵyn bildiredi», dep jazdy uıymnyń Qazaqstandaǵy baspasóz qyzmeti.
