Sport • 22 Tamyz, 2021

Toptyq kezeńge jaqyndaı tústi

74 ret kórsetildi

Eýrokýbok básekelerine qatysyp jatqan Qazaqstannyń eki komandasy ótken aptada pleı-off kezeńindegi alǵashqy oıyndaryn ótkizdi. Bıylǵy Eýrododa oıyndaryn Chempıondar lıgasynan bastap, úshinshi deńgeıli jarys sanalatyn Konferensııa lıgasyna deıin túsip qalǵan Almatynyń «Qaıraty» atalǵan týrnırdiń toptyq kezeńine birtaban jaqyndaı tústi. Al qazaqstandyq komandalar arasynda kúni búginge deıin sensasııa jasap kelgen Qaraǵandynyń «Shahteri» úshin kúzgi maýsymnyń aýyly alys­tap ketken sııaqty.

Chempıondardy joldan taıdyrǵan komanda

«Qaırat» Konferensııa lıgasynyń pleı-off kezeńinde osy jarysta táýir oıyn kórsetip kele jatqan «Fola» komandasymen kezdesti. Qazaqstandyq komanda sııaqty Lıýksembýrg klýby da byltyr óz eliniń chempıony atanyp, bıylǵy Eýrokýbok oıyndaryn Chempıondar lıgasynan bastaǵan bolatyn. Alǵashqy aınalymda olar óz alańynda Gıbraltar eliniń «Lınkoln» komandasymen kezdesip, birinshi oıynda 2:2 esebimen teń túsken edi. Biraq syrt alańdaǵy matchta qarsylastarynan 5:0 nátıjesimen jeńilip, Konferensııa lıgasyna túsip qaldy. Ereje boıynsha, Chempıondar lıgasynyń alǵashqy irikteý kezeńinde jeńilgen komanda birden Konferensııa lıgasyna jol tartady. Sóıtip «Fola» sý jańa jarystyń ekinshi kezeńinde Belarýs chempıony – «Shah­ter» klýbyna tap keldi. Solıgorskiniń komandasy da bıylǵy maýsymdy Chempıondar lıgasynda bastap, alǵashqy aınalymnan keıin Konferensııa lıgasyna túsip qalǵan. Bul teketireste «Fola» eki matchtyń qorytyndysy boıynsha 3:1 (2:1, 1:0) esebimen jeńiske jetip, úshinshi kezeńge joldama aldy. Taǵy bir aıta keterligi, «Shahter» klýbyn 2018-2019 jyldary Qazaqstanda jumys istep, elordanyń «Astanasyn» jattyqtyrǵan ýkraınalyq maman Roman Grıgorchýk baptaǵan edi. Osy jeńilisten keıin ol óz qyzmetinen ketýge májbúr boldy.

Lıýksembýrg ujymy kelesi aınalymda Soltústik Irlandııa chempıony – «Lınfıldpen» kezdesip, eki oıynda da 2:1 esebimen jeńiske jetti. Sóıtip 600 myńnan asa ǵana halqy bar shaǵyn memlekettiń ujymy Konferensııa lıgasynyń pleı-off kezeńine bir-aq shyqty. Kil chempıondardy joldan taıdyrǵan «Fola» toptyq kezeńge joldama beretin oıynda Qazaq­stan chempıonyna qarsylas atandy. Biraq bul ujymnyń alǵashqy oıynda «Qaıratqa» shamalary jetpedi.

Lıýksembýrgtegi «Jozı Bartel» stadıo­nyn­da ótken birinshi matchta almatylyqtar alań ıelerin esh qıyndyqsyz jeńdi. Oıyndaǵy alǵashqy goldy «Fola» fýtbolshylary soqty. Kezdesýdiń 19-mınýtynda bosnııalyq fýtbolshy Mırza Mýstafıch mergendigimen kózge túsip, jergilikti jankúıerlerdi qýanyshqa bóledi. Biraq arada 9 mınýt ótkende Artýr Shýshenachev Vagner Lavtyń pasynan keıin tarazy basyn teńestirip ketti. Al 37-mınýtta bul joly A.Shýshenachev brazılııalyq fýtbolshyǵa nátıjeli pas shyǵaryp berdi. О́z kezeginde Vagner Lav tamasha gol soǵyp, komandasyn esepte alǵa shyǵardy. Birinshi taım aıaqtalar tusta «Qaırat» oıynshylary tablodaǵy kórsetkishti 3:1-ge jetkizdi. Jýyrda ǵana alma­tylyq komandanyń quramyn tolyqtyrǵan por­týgalııalyq jartylaı qorǵaýshy Rıkardý Alvesh­tiń 43-mınýtta aıyp alańynyń syrty­nan baǵyttaǵan soqqysy qaqpa torynda týlady. Bul – Alveshtiń «Qaırat» sapyndaǵy alǵashqy goly.

Ekinshi taımda da «Qaırat» oıynshylary basymdyqty óz qoldarynda ustady. 69-mınýtta qarsylas komandanyń oıynshysy óz alańynda tártip buzyp, tóreshi 11 metrlik aıyp dobyn belgiledi. Penaltıdi sátti oryndaǵan Vagner Lav oıynnyń núktesin qoıdy. Qorytyndy esep – 4:1. Osylaısha «Qaırat» Konferensııa lıgasynyń toptyq kezeńine bir aıaǵymen shyǵyp tur dese de bolady. Aldaǵy beısenbi kúni ótetin qarymta kezdesýde almatylyq ujymǵa teń oıyn da jetkilikti. «Qaırat» Almatydaǵy Ortalyq stadıonda deńgeıi jaǵynan ózinen áldeqaıda tómen klýbtan jeńile qoımas.

Qaırat

 Toptyq kezeńnen úmit bar

Konferensııa lıgasynyń buǵan deıingi kezdesýleriniń birinshi oıynyn syrt alańda ótkizip, qarymta kezdesýlerde penaltı serııa­sy boıynsha qarsylastarynan basym túsip kele jatqan Qaraǵandynyń «Shahteri» pleı-off kezeńinde «dástúrdi» buzyp, alǵashqy oıynyn Qazaqstanda ótkizdi. Elordadaǵy «Astana Arenada» Izraıldiń eń myqty komandalarynyń biri sanalatyn Tel-Avıvtiń «Makkabıimen» kezdesken jerlesterimiz qolda turǵan jeńisinen aıyrylyp qaldy. Kezdesýdiń esebin «Shahter» fýtbolshylary ashqanymen, «kenshiler» komandasy eki mınýtta eki gol ótkizip aldy.

Byltyrǵy Eýropa lıgasynyń toptyq ke­ze­ńinde óner kórsetip, ekinshi orynmen pleı-off satysyna deıin jetken «Makkabı» qara­ǵandylyq komandanyń osy jarystaǵy eń azýly qarsylasy sanalady. Biraq bıyl Izraıl komandalarynyń qarqyny byltyrǵydaı qatty emes ekeni baıqalady. Máselen, Almatynyń «Qaıraty» Chempıondar lıgasynyń birinshi kezeńinde Haıfanyń «Makkabıin» eki oıyn qorytyndysy boıynsha 3:1 esebimen jeńse, Tel-Avıvtiń komandasy ótken oıynda Qazaq­stan chempıonatynda tómengi oryndarda kele jatqan «Shahterdi» 2:1 nátıjesimen áreń jeńdi.

«Shahter» men «Makkabı» arasyndaǵy birinshi kezdesýde alań ıeleri gol soǵylǵan ýaqytqa deıin qorǵanysta óte saýatty oıyn kórsetti. Negizinen qarymta shabýylǵa ıek artqan Magomed Adıev shákirtteri kezdesýdiń esebin birinshi bolyp ashty. Alańǵa ekinshi taımda shyqqan Idrıs Ýmaev arada bir mınýt ótkennen soń Eskendir Qybyraıdyń pasynan keıin ádemi gol soǵyp, komandasyna basymdyq syılaǵan edi. Biraq qazaqstandyq jankúıerlerdiń qýanyshy uzaqqa sozylmady. 75-mınýtta qonaqtar sapynan Avı Rıkan mergendik tanytyp, tarazy basyn teńestirse, 77-mınýtta Eden Shamır aýttan asyrylǵan pasty basymen qaqpaǵa dál baǵyttap, komandasyna jeńis syılady.

Endi «Shahter» 26 tamyzda Izraıldegi «Blýmfıld» stadıonynda qarsylastaryn jeńip, Konferensııa lıgasynyń toptyq kezeńine shyǵýdy kózdeıdi. Oǵan qaraǵandylyqtardyń tolyq múmkindigi bar.

Sońǵy jańalyqtar

Dollar qaıta kóterildi

Qarjy • Búgin, 16:35

BQO-da Astana kúni atap ótiledi

Elorda • Búgin, 15:59

Almaty qalasy «sary» aımaqta

Koronavırýs • Búgin, 10:28

Uqsas jańalyqtar