Foto: Reuters
Jeksenbide Aq úıde ótken brıfıngte AQSh Prezıdenti Djo Baıden Amerıka men aýǵan azamattaryn Talıban baqylaýyndaǵy Aýǵanstannan shyǵarýǵa ýáde berdi. Buǵan qosa, ol qaýip-qaterdiń jalǵasatynyn eskertti, onyń ishinde Horasan provınsııasyndaǵy DAISh músheleriniń shabýyl qaýpi bar.
Baıdenniń aıtýynsha, sońǵy aptada AQSh Kabýl áýejaıynan 28 myńǵa jýyq adamdy evakýasııalady. Osyǵan qaramastan, 31 tamyzǵa josparlanǵan evakýasııa merzimin uzartýdy surap otyrǵandar bar.
Amerıka Prezıdenti, basqa elderdiń basshylarymen merzimdi keıinge qaldyrý úshin kelissózder júrgizilip jatqanyn aıtty. Sonymen qatar Kabýl áýejaıyndaǵy AQSh áskerıleri qaýipsiz aımaqtyń perımetrin keńeıtkenin málimdedi.
«Biz ózgerister engizdik, sonyń ishinde áýejaıdyń aınalasyndaǵy kirý aımaǵyn - qaýipsiz aımaqty keńeıttik», dedi Baıden.
Ol AQSh Memlekettik departamentine Aýǵanstanda qalyp qoıǵan amerıkalyqtarmen telefon, elektrondyq poshta jáne basqa da baılanys quraldary arqyly habarlasýdy tapsyrǵanyn jáne Vashıngtonnyń olardy áýejaıǵa aldyrý týraly jospary bar ekenin atap ótti.
Sonymen qatar jeksenbide AQSh Qorǵanys mınıstrligi Aýǵanstanǵa kómektesý úshin azamattyq rezervtik áýe floty ornalastyrylǵanyn habarlady. Bul baǵdarlama boıynsha AQSh-tyń ár túrli avıakompanııasynyń 18 kommersııalyq ushaǵy adamdardy qaýipsiz elderge tasymaldaý úshin paıdalanylatyn bolady. Mundaı baǵdarlama úshinshi ret qoldanylyp otyr. Ol sońǵy ret 2003 jyly AQSh-tyń Irakqa basyp kirýi men 1990-1991 jyldardaǵy Parsy shyǵanaǵy soǵysy kezinde qoldanylǵan.
