Sharanyń tusaýkeser rásimin ashyp sóz sóılegen Shyǵys Qazaqstan oblysy ákiminiń orynbasary Azamat Mýhamedchınov: «Adamzatty ıadrolyq qarýdan azat etýge jáne jappaı qyryp-joıatyn qarýdy taratpaýǵa baǵyttalǵan elimizdiń saıasatyn halyqaralyq qoǵamdastyq moıyndady. Nátıjesinde, bul salada elimiz jahandyq kóshbasshylyq qabiletke ıe boldy. BUU minberinen, halyqaralyq forýmdardan, sondaı-aq ıadrolyq derjavalar basshylarymen jeke kezdesýler kezinde joǵarydaǵy ustanymdardy túbegeıli jáne dáıekti túrde qorǵaǵan elimizdiń Tuńǵysh Prezıdenti – Elbasy Nursultan Nazarbaevtyń róli erekshe» dedi.
«Semeı qasireti», «Elbasynyń ıadrolyq qarýsyz álem jolyndaǵy bastamalary» jáne «Beıbit atomǵa quqyq» atty úsh bólimnen turatyn ekspozısııalyq zalda Qazaqstannyń táýelsizdik tarıhynan syr shertetin Elbasy kitaphanasy qoryndaǵy arhıvtik materıaldar, jádigerler jáne tarıhı kitaptar kesheni kópshilik nazaryna usynyldy. Sonymen qatar Qazaqstan Respýblıkasynyń Tuńǵysh Prezıdenti – Elbasy N.Nazarbaevtyń ıadrolyq qarýsyzdaný jáne ıadrolyq qarýdy taratpaý isine qosqan úlesi úshin berilgen halyqaralyq marapattar da kórme tórinen oryn aldy.
Elbasynyń ıadrolyq qarýsyzdaný bastamasynan keıin Nevada, Novaıa Zemlıa, Lobnor, Mýrýroa polıgondary jabylyp, nátıjesinde, BUU Bas assambleıasy 29 tamyzdy «Iаdrolyq synaqtarǵa qarsy halyqaralyq kúres kúni» dep jarııalady. Osylaısha, Elbasy bastamasy jer betinde ıadrolyq qarýsyz álemdi qurý men nyǵaıtýdyń ózegine aınaldy.
Qazirgideı dúnıe júzin geosaıası turaqsyzdyq jaılaǵan tusta, Elbasynyń ıadrolyq qarýdan bas tartý ıdeıasy jahandyq bitimger retinde erekshe mańyzǵa ıe bolǵany shyndyq. Osy oraıda kórme tórinen Tuńǵysh Prezıdent N.Nazarbaev 2016 jylǵy 31 naýryzda Vashıngtonda usynǵan «Manıfest. Álem. XXI ǵasyr» atty usynysy ýaqyt óte kele, Bas Assambleıa men BUU Qaýipsizdik Keńesiniń resmı mártebesine ıe bolǵany jaıly qujat ta kórme sóresinen oryn aldy.
