Atalǵan óner ordasynyń dırektory, Qazaqstannyń eńbek sińirgen qaıratkeri Ǵalym Ahmedıarov teatr maýsymynyń ashylýy aldymen ártister men kórermender úshin mazmundy mereke ekenin atap ótti.
– Bul maýsymdy elimizdegi jańa ahýalǵa beıimdelgen jaǵdaıda bastap, barlyq sanıtarlyq talapty saqtaımyz. Teatr ujymy vaksına alǵan, sebebi biz ózimizge ǵana emes, kórermenderdiń de densaýlyǵyna alańdaımyz. Jańa maýsymnyń alǵashqy jartysynda bes premera usynylady. Bul opera jáne balet trýppasyna aıtarlyqtaı salmaq bolmaq, óıtkeni onymen birge repertýar qoryndaǵy spektaklder de qoıylady. Sonymen birge kórnekti tulǵalardyń shyǵarmashylyǵyna arnalǵan mereıtoılyq keshter men ata-analarǵa da qyzyqty balalar repertýaryn keńeıtýdi josparlap otyrmyz, − degen ol, sózin odan ári jalǵap, toǵyzynshy maýsymda – jurtshylyqqa balet ártisteriniń jańa esimderin ashyp, qysqa úzilisten keıin sahnada prıma-balerına Mádına Basbaeva óner kórsetetinin jetkizdi.
Sondaı-aq aldaǵy 2 jáne 3 qyrkúıekte astanaǵa Shymkent opera jáne balet teatry gastroldik saparmen kelip, Tasqyn Jarmuqamettiń qasıetti jannyń kórkem beınesi sıpattalǵan «Domalaq ana» operasyn qoıady. Odan keıin Mádenıet jáne sport mınıstrligi jáne teatrdyń turaqty bas demeýshisi Halyk Bank qoldaýymen «Astana Operanyń» qoıylymdar kezegin Piccolo teatry jobasynyń aıasynda «D.Chımarozanyń «Jasyryn neke» operasy jalǵastyrady. Jetkinshekterge arnalǵan M.Mınkovtyń «Sıqyrly mýzyka nemese operany birge jasaıyq» jáne A.Baıǵojaevtyń lıbrettosyna qoıylǵan J.Dástenovtiń «Qańbaq shal» atty alǵashqy qazaq balalar operasynyń premerasy da kórermen kóńilinen shyǵady degen oıdamyz.
Sonymen qatar ónersúıer qaýym V.A.Mosarttyń mýzykasyna qoıylǵan Irjı Kılıannyń «Alty bı» jáne Dıýla Harangozonyń horeografııasyndaǵy Tıbor Kochaktyń mýzykasymen órilgen «Aqshaqar men jeti ergejeıli» spektaklderin tamashalaıdy.
Al Táýelsizdigimizdiń otyz jyldyǵyna oraılastyrylyp sahnalanatyn kórnekti kompozıtor Erkeǵalı Rahmadıevtiń «Alpamys» operasy jańa maýsymnyń tuǵyrly týyndysy sanalmaq.
