2018 jyly «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵy qyzmetkerleri Qazan qalasyna sapar jasaǵan kezde zańdar jınaǵyn tapqan.
Qaramola jarǵysy – adam quqyǵy men bostandyǵyn qorǵaý týraly erejeler jınaǵy. Kodeks 1885 jyly Qaramola eldi mekenindegi sezde, Abaı joǵarǵy bı bolyp saılanǵanda qabyldanǵan. Keıin Semeı áskerı gýbernatorynyń buıryǵymen Qazan ýnıversıtetiniń baspasynda arab álipbıimen shyǵarylǵan.
«1885 jyly Qaramola eldi mekeninde bılerdiń sezdi ótti. Sol sezde Abaı joǵarǵy bı bolyp saılandy. Reseı úkimetiniń jergilikti ókilderi hakimnen zańdar jınaǵyn jazyp berýdi ótingen. Úsh kún ishinde bılermen keńese otyryp, Abaı osy jarǵyny shyǵardy», deıdi Abaı atyndaǵy mýzeı dırektory Meıramgúl Qaırambaeva.
Jarǵynyń tek kırıl qarpimen jazylǵan nusqasy Semeıdegi mýzeıde 60-jyldardan beri bar. Túpnusqasy endi tabystaldy.
«Endi zertteýshiler kırıl qarpimen mashınkamen jazylǵan kóshirmesin túpnusqamen salystyra alady. Sonymen qatar birqatar máselelerge núkte qoıylady. Sebebi buǵan deıin keıbir taraýlar boıynsha daý-damaılar týyndaǵan edi. Kırıll qarpine aýdarǵanda da qatelikter ketýi múmkin. Zertteýshiler úshin bul óte úlken olja», dedi mýzeı dırektory.
