Bilim • 27 Tamyz, 2021

Ǵalymdar eki atalym boıynsha grant ıelene alady

82 ret kórsetildi

Qazir «Táýelsizdik urpaqtary» grantyna úmitkerlerden ótinimder qabyldanyp jatyr. Jýrnalıstik saýaldamadan birshama ǵalymnyń dál osy grantty olardyń da alýyna bolatynynan beıhabar ekenin bildik. Sonymen bul qandaı konkýrs, oǵan ǵalymdar men zertteýshiler qalaı qatysa alady?

Memleket basshysy Q.Toqaev «Táýel­siz­dik bárinen qymbat» atty maqala­synda Táýelsizdik jyldary dúnıege kel­gen daryndy jastarǵa naqty qoldaý re­tinde «Táýelsizdik urpaqtary» atty grant taǵaıyndaý qajettigin aıtqan edi. Prezıdenttiń osy tapsyrmasyn iske asyrý maqsatynda konkýrstyń uıym­das­tyrýshysy retinde Aqparat jáne qoǵam­dyq damý mınıstrligi 2021 jyldyń 8 shil­de­sinde Úkimet qaýlysymen «Táýelsizdik ur­paqtary» grantyn taǵaıyndaý bo­ıynsha erejeleri men tujyrymdamasyn be­kit­ti. Buǵan deıin atalǵan vedomstvonyń ja­nyndaǵy Jastar jáne otbasy isteri komıtetiniń tóraǵasy Shahmardan Baımanov Ortalyq kommýnıkasııalar qyzmetinde ótken brıfıngte: «Táýelsizdik rýhymen ósip kele jatqan táýel­s­izdiktiń búgingi urpaqtary – bizdiń er­teńgi úmitimiz, senimdi tiregimiz. 30 jyl­dyq tarıhy bar Táýelsiz Qazaqstannyń mem­lekettik saıasatynda da jastardy qoldaý jáne adamı kapıtaldy damytýǵa basymdyq beriledi. Qazirgi tańda elimizdegi Táýelsizdik urpaqtary 3,8 mln nemese el halqynyń 20%-yn quraıdy. Bıyl alǵash ret Táýelsizdiktiń 30 jyldyǵyna oraı úzdik 30 jobaǵa 3 mln teńgeden «Táýelsizdik urpaqtary» atty grant be­ri­le­di. Elimizdiń 14-29 jas aralyǵyndaǵy barlyq azamattaryna arnalǵan bul grant bel­sendi shyǵarmashyl jastardyń jobalaryn, bas­tamalaryn iske asyrý, qolda bar jobalardy damytý, ǵylymı jáne qoldanbaly zertteýler júrgizý jáne jas­tardy oqytý úshin paıdalanýǵa berýdi kózdeıdi», degen bo­latyn.

Elimizdiń normatıvtik quqyqtyq aktileri jarııa­lanatyn «Ádilet» aqparattyq-qu­qyq­tyq júıesinde «Táýelsizdik urpaq­tary» grantyn taǵaıyndaýdyń erejeleri kór­setilipti. Qujattyń 1-taraýy, 6-tar­ma­ǵynda granttyń Qazaqstan azamatyna jańa ıdeıalar men bastamalardy iske asyrý úshin konkýrstyq negizde birneshe baǵyt boıynsha beriletini, sonyń ishinde «Ǵylym» baǵytynda ǵylymnyń basym sektorlarynda jańa ǵylymı jobalardy jáne zertteýlerdi iske asyrýǵa arnalǵany jazylǵan.

Ǵalymdar men zertteýshilerdiń, otan­dyq ónertap­qyshtardyń osy konkýrsqa «Ǵylym» baǵyty boıynsha qatysa alatyny belgili. Degenmen taǵy bir baǵyt bo­ıynsha jobasyn konkýrsqa ótkizýine bolady. Aıtalyq, granttyń erejelerinde «Ǵylym» baǵytynan bólek «Bıznes» dep atalatyn baǵyty da bar. Al ónertabystyń, ǵylymı izdenistiń, zertteýdiń nátıjesinde jasalǵan bıznes joba basqa ıdeıalardan áldeqaıda tabysty, ónimdi bolatyny anyq. Osy rette ǵalymdar men zertteýshiler ózi­niń ǵylymı ónimin ómirge ákelý úshin grant alyp, ıdeıasyn bıznes joba retinde iske asy­ra alady.

Endi granttyq konkýrstyń sharttary men talaptaryna kelsek. Grantty 14-29 jas aralyǵyndaǵy jastar ıelene alady. Bıyl grant ıegerleriniń árqaısysyna 3 mln teńge taǵaıyndalady. Konkýrs negizinde barlyǵy 30 grant bólinedi. Grant qarjysy bir jylǵa ǵana beriledi. Konkýrs eki kezeńnen turady. Alǵashqy kezeńde ýákiletti organ konkýrstyq ótinimderdi qabyldaıdy. Qabyldaý ótken aıdyń 19-ynan bastaldy, bul prosess aldaǵy qyrkúıek aıynyń 20-syna deıin jalǵasady. Al ekinshi kezeńde jeńimpazdar anyqtalady. Jeńimpazdar konkýrsty uıymdastyrýshy vedomstvo qurǵan arnaıy konkýrstyq komıssııanyń otyrysynda iriktelip, belgili bolady. Konkýrstyq komıssııanyń otyrystary mınıs­tr­liktiń áleýmettik jelilerdegi resmı paraqshalarynda onlaın rejimde ótedi.

Úmitker ótinimdi memlekettik nemese orys tilinde ótkize alady. Eń aldymen jobanyń sıpattamasy berilýi tıis. Onda jobanyń ataýy men baǵytynan bastap usynylyp otyrǵan aýdıtorııasy, mıssııasy, ónimi, smetasy men iske asyrý geografııasyna deıin kórsetilýi kerek. Sonymen qatar jobanyń 1 mınýttan aspaıtyn vıdeo tanystyrylymyn ázirlep, qosa joldaýy tıis. Bir jylǵa beriletin grantty ıelenýshi ár úsh aı saıyn jobanyń iske asyrylý barysy týraly esepti ýákiletti organǵa usynyp otyrady. Grant qarajatynyń basqa baǵytta jumsalǵany anyqtalsa, ýákiletti organ grant alýshyny jazbasha habardar etedi. Habarlandyrý jiberilgen kúnnen bastap bir aı ishinde grant alýǵa qarajatty memleketke qaıtarýy qajet. Joba iske asyrylmasa da grant qarajaty qaıtarylmaıtyn jaǵdaılar bar. Bul týraly konkýrstyń erejesinde:

«Qarajat:

1) grant alýshy qaıtys bolǵan;

2) grant alýshy habar-osharsyz ketti dep tanylǵan nemese qaıtys boldy dep jarııalanǵan;

3) grant alýshy is-áreketke qabiletsiz dep tanylǵan jaǵdaılarda (rastaıtyn qujattar bolǵan kezde) qaıtarylmaıdy», delingen.

Úmitkerlerdiń ótinimi qaǵaz nusqa­sy Nur-Sultan qalasy, Máńgilik el 8, «Mınıstrlikter úıi» ákimshilik ǵımara­ty­nyń 14-kireberisinde, al elektrondy nusqasy [email protected] poshta­synda qabyldanady. 8 (7172) 74-05-25, 8-705-822-33-33 baılanys nómirleri ar­qy­ly habarlasyp, suraqtarǵa jaýap alýǵa bolady.

Sońǵy jańalyqtar

Dollar qaıta kóterildi

Qarjy • Búgin, 16:35

BQO-da Astana kúni atap ótiledi

Elorda • Búgin, 15:59

Uqsas jańalyqtar