QQDI qyzmetkerleri aýyl kitaphanasynyń qoryna 100-den astam ǵylymı, kórkem jáne pýblısıstıkalyq, sondaı-aq balalar ádebıetine qatysty eńbek jetkizdi. Onyń ishigde «Rýhanı jańǵyrý» baǵdarlamasynyń «Qazaq tilindegi gýmanıtarlyq 100 jańa oqýlyq» jobasy aıasynda qazaq tiline aýdarylǵan álemdik ozyq ýnıversıtetterdiń gýmanıtarlyq baǵyttaǵy oqýlyqtary men kitaptary da bar.
«QQDI «Rýhanı jańǵyrý» jáne aımaqtyq jobalyq keńseleri de «Aýylyma kitap» aksııasyna belsendi at salysyp jatyr. Búgin biz álemdik úzdik kitaptardyń qazaq tiline aýdarylǵan nusqasyn Qabanbaı aýylynyń jastary men balalaryna arnap tabystap jatyrmyz. Aýyldyq jerlerdegi kitaphana qorynyń sapasy qalalyq, respýblıkalyq mektepterdegi qorlardan erekshelenedi. «Aýylyma kitap» aksııasy dál osy túıitkildi máseleni sheshýge baǵyttalǵan», degen «Rýhanı jańǵyrý» QQDI Basqarma Tóraǵasynyń orynbasary Ásem Serikqazyqyzy barlyq yntaly azamatty atalmysh aksııaǵa qatysýǵa shaqyrdy.
Málim bolǵandaı aýyldyq jerlerdegi kitaphana qoryn sapaly kitaptarmen tolyqtyrý maqsatynda Otbasy kúnine oraı elimizde respýblıkalyq deńgeıdegi «Aýylyma kitap» qaıyrymdylyq aksııasy bastalǵan bolatyn. Bul aksııa QR Aqparat jáne qoǵamdyq damý mınıstrliginiń qoldaýymen QQDI «Rýhanı jańǵyrý» Otbasy ınstıtýtyn zertteý ortalyǵy jáne «Azamattyq bastamalardy qoldaý ortalyǵy» kommersııalyq emes aksıonerlik qoǵamynyń áleýetimen júzege asyp jatyr.
«Kitap jınaý jáne tabystaý sharalary respýblıkalyq deńgeıde barlyq eldi-mekende tamyzdyń 16 men qyrkúıektiń 20 aralyǵynda ótedi. Aksııa barysyndaǵy barlyq aqparattardy #Aýylymakitap2021 heshtegi arqyly taba alasyzdar», dep habarlady vedomstvo. 
