Álem • 31 Tamyz, 2021

Túrik azamatshasy: Atajurttaǵy baýyrlarymnyń qolyna tiken batsa, men onyń aýyrtpalyǵyn sezinemin

202 ret
kórsetildi
1 mın
oqý úshin

Túrik azamatshasy Kyrykkaledegi úıine Qazaqstan týyp ilip, Jambyldaǵy jaǵdaıǵa baılanysty kóńil bildirdi, dep jazady Egemen.kz.

Túrik azamatshasy: Atajurttaǵy baýyrlarymnyń qolyna tiken batsa, men onyń aýyrtpalyǵyn sezinemin

29 tamyz Qazaqstanda ulttyq aza tutý kúni bolyp jarııalanǵany belgili. Osy kúnge oraı Kyrykkale qalasynyń turǵyny Qazaqstan týyn úıiniń balkonyna ilip qoıǵan.

«Qazaqstanda bolǵan jarylys saldarynan sheıit bolǵan jaýyngerler men qazaq baýyrlarymyzdyń qazasyna qatty qaıǵyrdym. Alla Taǵala olardyń otbasylaryna sabyr bergeı. Qazaqstan – meniń ata jurtym, Túrki áleminiń jarqyraǵan juldyzy, barshamyzdyń qara shańyraǵymyz.  Eger atajurtymda meniń bir baýyrymnyń qolyna tiken batsa, men onyń aýyrtpalyǵyn sezinemin. Jaralylar tez saýyǵyp ketsin, Alla atajurtymyzdy qorǵasyn. Prezıdent Qasym-Jomart Toqaev pen Elbasymyz Nursultan Ábishulyna jáne barlyq qazaq baýyrlaryma sálemimdi joldaımyn. Olardyń aýyrtpalyǵyn júregimmen bólisemin. Ol jerge baryp, qoldaý kórsete almaıtyndyqtan, óz úıimniń balkonyna ata jurtymnyń kók týy men óz elimniń aı men juldyzdy týyn ilip, sizdermen birge ekenimdi bildirgim keldi», dedi Fatma Sónmez.

Fatma - densaýlyq saqtaý salasynyń qyzmetkeri. 27 jyl boıy Qazaqstan-Túrkııa qarym-qatynasynyń damýyna óziniń jeke jobalarymen erikti túrde úles qosyp keledi. Ol Túrkistan qalasyndaǵy densaýlyq saqtaý salasynda da óz eńbegin sińirgen jáne tarıhı-mádenı oryndardy túrik tilinde nasıhattaýǵa da belsene úles qosyp júrgen birden-bir janashyr jandardyń biri.

Fatma Sónmez Túrkistan qalasynyń Qurmetti azamaty atanyp, Qazaqstan tarapynan birneshe medal jáne syılyqtarmen marapattalǵan.