Almaty qalasy ákimdiginiń qarajaty esebinen klınıka jáne epıdemıologııa mamandaryn daıarlaý úshin Asfendııarov atyndaǵy QazUMÝ-de jáne Qazaqstan-Reseı medısınalyq ýnıversıtetine 120 grant bólindi. Onyń 110-y rezıdentýra, 10-y magıstratýra úshin qarastyrylǵan.
Búginde Almatyda 300-den astam dáriger jetispeıdi. Memlekettik bilim berý tapsyrysy aıasynda klınıkalyq mamandyqtar boıynsha rezıdentýrada oqýǵa respýblıkalyq bıýdjet esebinen 38 grant bólinedi. Ákimdikten berilgen 120 grant kadr tapshylyǵyn aldaǵy 2-3 jylda jabady dep josparlanyp otyr.
Aıta keteıik, komıssııa úmitkeri az mamandyqtar boıynsha granttardy qaıta bólý, suranysy joǵary, sonymen qatar «kardıohırýrgııa», «neonatologııa» mamandyqtary boıynsha granttar sanyn kóbeıtý týraly sheshim qabyldady. Sonymen qatar, COVID-pen emdeletin aýrýhanada isteıtin mamandardyń da qajet ekeni eskerildi. Atap aıtqanda, anestezıologııa jáne reanımasııaǵa - 35 grant, juqpaly aýrýlar - 18, terapııa - 10, pýlmonologııa - 6, kardıologııa - 2, pedıatrııa - 9, neonatologııa - 3, nevrologııa - 3, otolarıngologııa - 6, klınıkalyq farmakologııa - 2, gastroenterologııa - 6, oftalmologııa - 3, endokrınologııa - 3, balalar hırýrgııasy - 2, travmatologııa jáne ortopedııa - 2, jedel medısınalyq kómek - 3, fızıkalyq medısına jáne ońaltý - 5, neırohırýrgııaǵa - 2 grant bólindi.
Grant ıegerleri 2-3 jyldyq oqý aıaqtalǵannan keıin Almaty qalasynyń memlekettik medısınalyq uıymdarynda jáne qalanyń qoǵamdyq densaýlyq saqtaý basqarmasyna baǵynyshty uıymdarda bes jyl jumys isteýi kerek.
