Kún tártibindegi máselege kirispes buryn Májilis Tóraǵasy depýtattyq korpýstyń nazaryn Memleket basshysy Qasym-Jomart Toqaevtyń Qazaqstan halqyna Joldaýynda aıtylǵan basymdyqtarǵa aýdardy.
– Memleket basshysy Qasym-Jomart Kemeluly Toqaevtyń búgingi Joldaýy – Qazaqstanymyzdyń turaqtylyǵyn saqtaı otyryp, eldi odan ári damytýǵa arnalǵan strategııalyq qujat. Sebebi Joldaýda saıası, áleýmettik, ekonomıkalyq ósip-órkendeýdiń naqty joldary, naqty qadamdary kórsetildi. Onyń ishinde, ásirese, agroónerkásip, densaýlyq, bilim, aımaqtar damýy jáne basqa da baǵyttardy nyǵaıtýǵa erekshe kóńil bólinip otyr. Al bizdiń depýtattyq korpýstyń endigi basty maqsaty – ol osy barlyq bastamalardy sapaly zańdarmen qamtamasyz etý, – dedi Nurlan Nyǵmatýlın.
Conymen qatar Májilis Tóraǵasy bıýdjet-qarjy júıesin jaqsartý, eldi saıası jańǵyrtýdy jalǵastyrý sııaqty mindetterge de nazar aýdardy. Osy tapsyrmalardyń barlyǵy Parlamenttiń aldaǵy kezeńdegi zań shyǵarý jumysy úshin de aıqyn baǵyt bergenin atap ótti. Qazaqstan Prezıdentiniń Joldaýynda belgilengen eldi júıeli jańǵyrtý úshin myqty zańnamalyq bazany sapaly jáne jedel qurý qajettigine toqtaldy.
Májilis Spıkeri depýtattar qaraýyndaǵy zań jobalary týraly aıta kelip, qazir Palatada qaralyp jatqan ónerkásiptik saıasat týraly zań jobasyna, el Prezıdenti ázirlep, qabyldaýdy tapsyrǵan aglomerasııany damytý, kásibı biliktilik týraly zań jobalaryna da nazar aýdardy.
Nurlan Nyǵmatýlın depýtattar aldynda Áleýmettik kodeks jobasymen jumys turǵanyna nazar aýdardy. Osy jáne basqa da zań jobalary boıynsha barlyq jumys, ádettegideı, ashyq jáne transparentti túrde júrgiziletinin, ol azamattyq qoǵam, buqaralyq aqparat quraldary ókilderiniń belsendi túrde qatysýymen ótkiziletinin atap ótti.
Jalpy otyrysta Palata komıtetteri qorytyndy ázirleý úshin birqatar jańa zań jobasyn jumysqa aldy. Olar: Ulttyq qordan 2022-2024 jyldarǵa arnalǵan kepildendirilgen transfert týraly, 2022-2024 jyldarǵa arnalǵan respýblıkalyq bıýdjet týraly zań jobalary.
Sondaı-aq Táýelsizdiktiń 30 jyldyǵyna baılanysty raqymshylyq jasaý týraly zań jobasy da jumysqa alyndy.
– Bul zań jobasy Memleket basshysynyń 2020 jylǵy 29 qazandaǵy tapsyrmasyn oryndaý maqsatynda ázirlendi. Zań jobasy Qazaqstan Respýblıkasy Táýelsizdiginiń 30 jyldyǵyna oraı izgilik qaǵıdaty negizinde qylmystyq atqarý júıesi mekemelerinde ustalatyn jáne probasııa qyzmetiniń esebinde turǵan adamdardy jazadan ári qylmystyq jaýaptylyqtan bosatýǵa, jazanyń ótelmegen bóligin qysqartýǵa baǵyttalǵan, – dedi Májilistiń Zańnama jáne sot-quqyqtyq reforma komıtetiniń tóraǵasy Arman Qojahmetov.
Onyń aıtýynsha, qoǵam jáne memlekettiń qaýipsizdigine eleýli qater tóndirmeıtin qylmystar jasaǵany úshin sottalǵan adamdardy, onyń ishinde áleýmettik osal top sanatyndaǵy el azamattaryn jazadan bosatýǵa múmkindik beredi.
Sonymen qatar Qylmystyq kodekske ólim jazasy máseleleri boıynsha túzetýler engizý týraly, quqyq qorǵaý qyzmetin ótkerý tártibin jetildirý, sybaılas jemqorlyqqa qarsy is-qımyl máselelerine qatysty ózgerister men tolyqtyrýlar engizý týraly zań jobalary boıynsha qorytyndy ázirlenedi.
Qazaqstan Respýblıkasynyń bıologııalyq qaýipsizdigi týraly jáne oǵan ilespe zań jobalary, básekelestikti damytý máseleleri boıynsha jáne kólik máseleleri týraly jańa zań jobalaryn da Palata komıtetteri jumysqa aldy.
Jumysqa alynǵan jańa zań jobalarynyń qatarynda birqatar ratıfıkasııalyq qujat bar. Atap aıtqanda, derbes derekter almasý salasyndaǵy ákimshilik máseleler boıynsha ózara quqyqtyq kómek týraly, Eýrazııalyq ekonomıkalyq komıssııanyń básekelestiktiń biryńǵaı qaǵıdalarynyń saqtalýyn baqylaý jónindegi ókilettikterdi júzege asyrýy kezinde qupııa aqparatty qorǵaý tártibi jáne ony jarııa etkeni úshin jaýaptylyq týraly kelisimge ózgerister engizý týraly hattama, Qazaqstan men Qyrǵyzstan jáne Tájikstan úkimetteri arasyndaǵy óteýsiz áskerı-tehnıkalyq kómek kórsetý týraly kelisimderdi jáne Táýelsiz Memleketter Dostastyǵyna qatysýshy memleketter Qarýly Kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkasııalaý josparlanyp otyr.
Budan bólek, qaralatyn qujattar qatarynda Kaspıı teńiziniń teńiz ortasyn qorǵaý jónindegi negizdemelik konvensııaǵa Kaspıı teńizin jerústi kózderinen jáne qurlyqta júzege asyrylatyn qyzmet nátıjesinde lastanýdan qorǵaý jónindegi jáne Kaspıı teńiziniń teńiz ortasyn qorǵaý jónindegi negizdemelik konvensııaǵa bıologııalyq áralýandylyqty saqtaý týraly hattamalardy ratıfıkasııalaý týraly zań jobalary bar.
Otyrys sońynda Májilis depýtattary memlekettik organdar basshylaryna depýtattyq saýaldar joldady. Olar: Maqsat Ramanqulov, Erlan Saırov, Erlan Smaılov, Aleksandr Mılıýtın, Berik Dúısenbınov, Ekaterına Smyshlıaeva, Natalıa Dementeva, Qudaıbergen Erjan, Mádı Ahmetov, Aıjan Sqaqova, Albert Raý, Artýr Platonov.
Májilistiń jalpy otyrysynda Qazaqstan Respýblıkasy Parlamenti Májilisiniń depýtaty Azat Sembınovtiń ókilettigin merziminen buryn toqtatý týraly qaýly qabyldandy.
Ortalyq saılaý komıssııasynyń múshesi Asylbek Smaǵulovtyń aıtýynsha, Májilis depýtaty Azat Sembınov mindetterin atqarýdan óz erkimen bosatý týraly ótinish bergen.
– Osyǵan oraı Ortalyq saılaý komıssııasy sizderdiń nazarlaryńyzǵa zańnamaǵa sáıkes Parlament Májilisiniń depýtaty Azat Sembınovtiń ótinish berýine baılanysty onyń ókilettigin merziminen buryn toqtatý týraly máseleni sheshý úshin usynym engizip otyr, – dedi A. Smaǵulov.
Sondaı-aq Qazaqstan Respýblıkasy Parlamenti Májilisiniń depýtaty Nurlybek Ojaev ant berip, Agrarlyq máseleler komıtetiniń quramyna saılandy.
