Memleket basshysynyń nazaryndaǵy mektep paıdalanýǵa berildi

Temirjolshylar mekenindegi problemany kótergen «Temir joldy jaǵalap top bala júr» atty sol maqaladan keıin Memleket basshysy Qasym-Jomart Toqaev Twitter-degi paraqshasynda ózekti máseleni sheshý úshin Úkimet naqty sharalar qabyldaýy qajettigin jazǵan bolatyn. Osydan keıin kóp uzamaı qurylysy bastalǵan mektep bıylǵy Bilim kúninde paıdalanýǵa berildi.

Eki qabattan turatyn bilim osha­ǵynyń birinshi synybyna 40 bala qa­byldanyp otyr. Eki aýysymda 442 bala bilim alatyn mektepte 20 synyp kesheni, sport, májilis zaldary, kitap­hana, ashana bar.

Jańa nysannyń ashylýynda oblys ákiminiń orynbasary Baljan Shámenova balalardy Bilim kúnimen quttyqtap, jyl saıyn turǵyndar qatary kóbeıip kele jatqan aýmaqtaǵy tıptik mektep memlekettiń salaǵa degen erekshe qoldaýynyń kórinisi ekenin atap ótti.

Temir jol salasynyń ardageri Bólek­baı Bekturǵanovtyń aıtýynsha, jurt kóptep qonys tebe bastaǵan aýdannan mek­tep salý máselesi sońǵy 20 jyl bederin­de dúrkin-dúrkin kóterilip kelgen eken.

«Poıyzdar júıtkip jatqan joldy ke­sip ótýdiń qaýpin aıtyp jatý artyq shy­ǵar. Sol jolmen mektepke ketken bala­sy qaıtyp kelgenshe úlkender jandaryn shúbe­rek­ke túıip otyratyn edi. Bas gazette kóteril­gen máseleni nazarǵa alyp, tıisti oryn­darǵa tapsyrma bergen Memleket basshy­sy­na, jaqsy istiń basynda júrgen azamat­tarǵa aıtar alǵysymyz sheksiz», deıdi ardager.

Kent turǵyny Gúlnáz Ábdil­daeva kishkentaıyn birinshi synypqa alyp kelipti. Buryn shoıyn joldyń arǵy betine qatynap oqyp kelgen eki qyzy da endi jańa mektepte oqıdy.

«Balalarymyz on bes rels­ten ótip kelgenshe alańdap, aldynan shyǵyp kútip alatynbyz. Ásirese erte qas qaraıa­tyn qystyń kúni qıyn edi. Shúkir, ol kúnder de artta qaldy» deıdi ol.

– On bes myńǵa jýyq turǵyny bar kenttegi úlken másele – bar mekteptiń temir joldyń bir jaq betinde ornalas­qan­dyǵy edi. Endi ol tolyǵymen sheshildi. Sho­ıyn joldyń osy betindegi bala­nyń bári jańa mektepte bilim alady. Jalpy, jyl saıyn ob­lysta bilim oshaǵy­nyń tabal­dy­ryǵyn tuń­ǵysh attaıtyn bala­lardyń qatary kóbeıip kele jat­qany baıqalady. Bıyl óńirde 7 004 túlek mektep bitirse, birin­shi synypqa 18 279 bala qa­byl­d­anyp otyr. Osyǵan baılanysty memleket-jekemenshik áriptestigi aıasynda salynatyn bilim oshaqtarynyń qataryn kóbeı­týdi qolǵa aldyq. Bıyl 6 mektep paıdalanýǵa berilse, aldaǵy 5 jyl­da 28 bilim oshaǵy boı kótere­di, – deıdi oblys­tyq bilim bas­qar­­ma­synyń basshysy Aqzıra Qasymova.

Saltanatty sharadan keıin sanıtar­lyq talapty saqtaı otyryp jańa mek­tep­tegi alǵashqy sabaq bastaldy.

Qyzylorda oblysy