«Zerttelmegen Qazaqstan» jobasynyń maqsaty – eldi kórsetý. Saıahatshylar Qazaqstannyń qoryq jáne kıeli jerlerin aralap, kórikti jerlerimen tanysady. Hronometrajy 20 mınýtty quraıtyn 20 serııany túsirý josparlanýda. Biraq bir serııasy festıvalge qatysý úshin 40 mınýttyq bolady.
Joba ishki naryqqa arnalǵan, biraq jasaýshylar sheteldik arnalarǵa qyzyǵýshylyq tanytatyndyǵyn joqqa shyǵarmaıdy. Sondyqtan serııalar qazaq, orysm jáne aǵylshyn tilderinde bolady.
Ekspedısııaǵa 12 adam qatysady. 10 qyrkúıekte olar Shyǵys Qazaqstanǵa attanady.
«Birinshi sıýjet Semeı ıadrolyq polıgony týraly bolmaq. Elbasynyń ıadrolyq polıgondy jabý týraly Jarlyǵyna 30 jyl bolatyny belgili. Biz adamdardyń qalaı ómir súrgenin eske salamyz», dedi Indiga production basshysy Rafael Gasanov.
Jumysqa kirispes buryn, Qazaqstannyń memlekettik organdary men Halyqaralyq uıymdarǵa qoldaý týraly birqatar hattar jiberildi. Mysaly, polıgon týraly serııany Birikken Ulttar Uıymy qoldaǵan. Sondaı-aq jobany elimizdiń joǵary basshylyǵy, beıindi vedomstvolar men agenttikterdiń sheneýnikteri, demeýshiler qoldap otyr.
Saıahatshylar baratyn oryndar tiziminde Ekibastuz GRES-i, Abylaı han rezıdensııasy, ALJIR lageri, Saıram qalashyǵy, Bozjyra shatqaly jáne t.b. bar.
«Bizdiń maqsatymyz – Qazaqstannyń tabıǵatyn kórsetý ǵana emes, sondaı-aq osy fılmderde jastardyń óz jerin baǵalap, súıip, qorǵaýy úshin olardyń boıynda otansúıgishtikti qalyptastyrý», dedi Rafael Gasanov.
