ATAMDY ARDAQ TUTAMYN

Uly Otan soǵysynyń surapyl jyldaryn basynan keshirgen halyq úshin Jeńis merekesiniń orny aıryqsha ekenin aıtyp jatýdyń ózi artyq sekildi. Uly Jeńisti ápergen ardagerlerimiz máńgi bizdiń jadymyzda. Osyndaı erlik pen órliktiń sımvolyna aınalǵan adamdardyń biri meniń atam – Bımálı Esmahanov. B.Esmahanov Aqtóbe oblysy, Yrǵyz aýdanynyń Qaraqum aýylynda dúnıege kelgen. Men Bımá­lı atam men Bıbatpa ájem­niń otyz bir nemeresiniń úlkeni­min. Balalyq shaǵym sol kisiler­diń kóz aldynda ótti. Atamnyń ómir joly men Otanǵa, anaǵa, jarǵa jáne balaǵa degen súıis­penshiligi sııaqty adamı qasıetteri meni árdaıym ıgilikti isterge jigerlendirip otyrdy. Qazirgi tańda jastarǵa aıtyp júrgen patrıotızm, el men jerdi súıý, úlkendi qurmettep, kishige qam­qorlyq kórsetý sekildi qasıet­terdiń barlyǵy Bımálı atamnyń ómir jolynan kezdesedi. Men de es kirgeli osyndaı qasıetterdi boıyma sińirýge tyrysyp baqtym. Bastan ótkergen qıyndyqtaryn estigende sol ýaqyttaǵy búkil qazaq halqynyń qıyn-qystaý tirshiligi kóz aldyńyzǵa elesteıdi. Atam eki soǵysqa da qatysqan kisi. Áskerge shaqyrylysymen-aq ataqty Fın urysyna qatysady. Odan elge qaıtam ba dep júr­geninde Uly Otan soǵysy basta­lyp kete barady. Qolyna qarý ustaǵan qalpy maıdannyń alǵy shebine attanǵan. Kóptegen aýyr shaıqastarǵa qatysyp, qarýlas dostaryna erliktiń úlgisin kór­setedi. Qazaq balasy degen sózge kir keltirmepti. Muz jas­tanyp, qar jamylǵan jyldary jóninde atam áńgime aıtqanda tebirenip ketetin. Mıllıondaǵan adamnyń qaza bolǵandyǵy janyna batatyn. Soǵystyń aty soǵys, Býgýlme qalasy mańyndaǵy surapyl shaı­qas kezinde atam aýyr jarala­nyp, artynsha áskerden bosatylady. III dárejeli Uly Otan soǵysy ordenine, birneshe medal­darǵa ıe bolǵan. Bımálı atam elge oralǵan soń da Otanyna paıdasyn keltirýge kiristi. Mektepte áskerı daıyn­dyq páninen dáris oqyp, oqýshy­lardy qasıetti Otandy súıýge, ony qorǵaı bilýge tárbıeledi. Biraq, jan alysyp, jan berisip jatqan aýyr kezeńde atam mundaı jumys­­ty ózine qol kórmeı, soǵys maı­danyna jaramasam, onda eńbek maıdanyna baramyn dep Bershúgir stansasynyń mańyndaǵy kómir shahtasyna jumysqa keledi. So­ǵys­tyń qıyn jyldary. Qorǵa­nys ónerkásibine kómirdiń asa qajet­tiligin atam jan-tánimen túsine bilgen eken. Onda da eńbek etýdiń úlgisin kórsetip, azǵantaı ýaqyt­tyń ishinde qatardaǵy ken qazý­shy­dan kenishtiń bas ınjeneri dárejesine deıin kóterilgen. Osy eńbek atamdy bıikterge kóterdi. Baqyt pen qýanysh syılady. Kenishte júrip meniń ájem Bıbatpamen tanysyp, ekeýi shańyraq kóteredi. Berekeli úlken otbasyǵa aınalady. Arystan, Balapan, Asan, Ásem, Úsen, Hasen, Esen, Esengeldi, Aıtbek esimdi balalary dúnıege keldi. Qyzmeti aýysyp ishki ister organyna kelgen atam munda da qurmet-bedelsiz bol­ma­dy. Atam jóninde aqtóbelik Lesbek Izbanov sekildi árip­testeri árdaıym jyly sózben eske alady. О́sip-óngen otbasy dep aıtyp jatady. Osylaısha adal eńbektiń arqasynda atam­nyń urpaqtary el syılaıtyn bir qaýym elge aınaldy. Bala-shaǵalary ártúrli qyzmet­terde abyroıly eńbek etýde. Uly Jeńisti jaqyndatyp, urpaqtary úshin qan tókken atalarymyzdyń qatary kún sanap sırep keledi. Ardaqty atam 1997 jyldyń 27 qań­tarynda 78-ge qaraǵan shaǵynda máńgilikke kóz jumdy. Uly Jeńistiń 65 jyldyǵy qar­sańyn­da meniń atam Bımálı Esmahanov sekildi Jeńis kúnin jaqyndatýǵa úles qosqan bar­lyq ardagerlerge shyn kóńilden bas ıip quttyqtaǵym keledi. Aramyzda aman-saý júre beriń­dershi, ardagerler! Gúljan ESMAHANOVA. ASTANA.