Dóńgelek ústel jumysyna Parlament Májilisiniń depýtattary, Aýyl sharýashylyǵy, Ekologııa, geologııa jáne tabıǵı resýrstar mınıstrligi, kvazımemlekettik sektor uıymdarynyń, BUU DB-nyń, Dúnıejúzilik banktiń, joǵary oqý oryndary men ǵylymı-zertteý mekemeleriniń jáne basqa da qoǵamdyq uıymdardyń ókilderi qatysty.
Is-sharany Parlamentarızm ınstıtýtynyń dırektory Mansurhan Mahambetov ashyp, qatysýshylardy Táýelsizdiktiń 30 jyldyǵymen quttyqtaı kelip, agroónerkásiptik keshenniń ekonomıkanyń mańyzdy sektorlarynyń biri retindegi mańyzyna toqtaldy. Aýyl sharýashylyǵy birinshi vıse-mınıstri Aıdarbek Saparov bul is-sharanyń óndiristik kesheni úshin asa qajettiligin atap ótti.
Jıyn barysynda Parlament Májilisiniń depýtaty, ekonomıka ǵylymdarynyń doktory, Agrarlyq máseleler komıtetiniń hatshysy B.Ospanov, Parlament Májilisiniń depýtaty, Agrarlyq máseleler jónindegi komıtetiniń múshesi B.Sartbaev, «QazAgroQarjy» AQ basqarma tóraǵasy A.Prashev, «Ulttyq agrarlyq ǵylymı-bilim berý ortalyǵy» UAQ basqarma tóraǵasy G.Isaeva, Qazaq ulttyq agrarlyq zertteý ýnıversıtetiniń professory, aýyl sharýashylyǵy ǵylymdarynyń doktory, Mal sharýashylyǵy jáne bıoresýrstar ǵylymı-zertteý tehnologııalyq ınstıtýtynyń dırektory B.Mahatov, BUU Damý baǵdarlamasynyń sarapshylary S.Baısholanov, D.Lı baıandama jasady.
Qazaq aýyl sharýashylyǵy ǵylymdary akademııasynyń prezıdenti Ǵ.Qalıev AО́K-tiń ózekti máselelerin sheshýde jumysty kúsheıtý qajettigin qozǵasa, Agrarlyq ǵylym men bilimniń damý máseleleri týraly sóılegen UAǴBO basqarma tóraıymy G.Isaeva Ulttyq agrarlyq ǵylymı-bilim berý ortalyǵynyń atqaryp otyrǵan jumystary men AО́K eńbek ónimdiligin arttyrýǵa baǵyttalǵan negizgi jobalarǵa toqtalyp, ǵylymı zertteýlerdiń nátıjelerin engizýge jáne elimizdegi ekstenshnniń damý barysyn sóz etti.
Jetekshi agrarlyq oqý ornynyń rektory Tilektes Espolov aýyl sharýashylyǵynda qordalanǵan kúrdeli máselelerdi ǵylymı turǵyda sheshýdiń joldaryn arqaý etip, ýnıversıtettegi ǵylymı is-tájirıbeler nátıjelerimen bólisti, sonymen qatar agroónerkásiptik kesheniniń aldyndaǵy kelesi mindetterge toqtaldy. Iаǵnı áleýmettik mańyzy bar azyq-túlik ónimderimen ózin-ózi qamtamasyz etý, aýyl turǵyndarynyń tabysynyń turaqty ósýi, eńbek ónimdiligin eki jarym ese arttyrý, aýyl sharýashylyǵy ónimderiniń eksportyn eki ese arttyrý qajettigin atap ótti.
«Qazaqstanda táýelsizdik alǵaly beri 10 baǵdarlamalyq qujat ázirlenip, olardyń negizinde agroónerkásiptik keshen salasyndaǵy memlekettik saıasat júzege asyrylýda. Alaıda qabyldanǵan zańdarǵa, baǵdarlamalarǵa jáne basqa qujattarǵa qaramastan, bul salada tıimdi nátıjelerge qol jetkizý múmkin bolmaı tur», dep atap ótti T.Espolov.
Búginde salada kóterme-taratý ortalyqtarynyń qyzmetin retteıtin normatıvtik quqyqtyq aktini ázirleý ýaqyt kúttirmeıdi. Al agroónerkásiptik keshen nysandaryna nesıe berýdiń tıimdiligin arttyrý, kredıtteýdiń nysanaly baǵyttarynyń pysyqtalmaýy, olardyń AО́K nysandarynyń birinshi kezektegi muqtajdyqtarǵa baǵdarlanbaýy, iske asyp jatqan jobalarǵa jergilikti atqarý organdary tarapynan monıtorıngtiń báseńdigi jıyn qatysýshylaryn tolǵandyrǵan máseleler qatarynda aıtyldy.
Agrarshylardy qazirgi kezeńde elimizdiń agroónerkásiptik kesheninde tehnıkalyq jaraqtandyrýdyń jetkiliksizdigi men ony óndiriske engizýdiń baıaýlyǵy, agrotehnologııalar transfertiniń shaǵyn jáne orta sharýashylyqtar úshin qoljetimsizdigi, jer, sý, eńbek resýrstaryn tıimsiz paıdalaný, paıdalanylatyn sýarmaly jerlerdiń 2,5 mln gektardan 1,1 mln gektarǵa deıin qysqaryp ketkendigi alańdatady. Salada qordalanǵan máseleler sonymen birge óńdelgen aýyl sharýashylyǵy óniminiń tómendigi, ınvestısııalyq turǵydan tartymsyzdyǵy, memlekettik qoldaýdyń azdyǵy, ónimderdi saqtaý men ótkizýdiń tıimsizdigi, zamanaýı ınnovasııalyq tehnologııalardyń qoljetimsizdigi sııaqty jaıttarmen jalǵasyn taba beredi. Osy oraıda keńeske qatysýshylar saladaǵy mańyzdy máselelerdi egjeı-tegjeı kórsetip, tıisti memlekettik organdarǵa usynys ázirlep, Parlamentarızm ınstıtýty men Qazaq ulttyq agrarlyq zertteý ýnıversıteti arasynda memorandýmǵa qol qoıyldy.
ALMATY
