«5 qyrkúıekke deıin adamdar О́zbekstanǵa ózbek vızasymen ótip jatqan. Biraq ótken túni tálipter shekara beketine bıometrıkalyq qondyrǵy ornatqan. Qazir onda burynǵy aýǵan úkimetinde jumys istegen qaýipsizdik kúshteriniń ókilderi turady. Olardyń qolynda qazirgi úkimet ázirlegen tizimder bar. Onda qylmys jasaǵandardyń, sheteldiktermen jumys istegenderdiń aty-jónderi bar», dep jazady Ortalyq Azııa jańalyqtar qyzmeti derekkózge silteme jasap.
Onyń sózinshe, Aýǵanstannan О́zbekstanǵa ótip jatqandardyń negizgi bóligin kásipkerler quraıdy.
Bul málimetti Aýǵanstanmen shektesetin Surhandarııa oblysyndaǵy derekkóz de rastaǵan. Onyń sózinshe, tamyz aıynda tálipter Aýǵanstandy basyp alǵannan keıin taýar tasıtyn poıyzdar toqtap qalǵan.
«400-ge jaqyn vagon qant, un, kúrish jáne suıyq maı sekildi azyq-túlik ótkizildi», dedi ol.
Tálipter Kabýldy basyp alǵannan keıin birinshi ret Aýǵanstan men О́zbekstan arasynda saýda qarym-qatynasy boıynsha áriptestik ornatýdyń alǵashqy belgileri paıda bola bastady.
1 qyrkúıekte ózbekstandyq júk tasýshy eki poıyz Aýǵanstanǵa barǵany habarlandy. Bul tálipter bılikke kelgennen keıingi ózbek taraptyń Aýǵanstanǵa jetkizgen alǵashqy kommersııalyq júgi.
О́tken aptada «Talıban» qozǵalysy О́zbekstannyń Táýelsizdik kúnine oraı joldaǵan quttyqtaýynda Tashkentti «áriptes» dep atap, ózbek tarap usynǵan aımaqtyq jobalardy qoldaýǵa daıyn ekenin málimdegen.
