Tóńkeris jetekshisi jáne eldiń arnaıy kúshteriniń bastyǵy, polkovnık Mamadı Dýmbýıa jeksenbide shtattyq translıasııalarda eldiń konstıtýsııasy toqtatylǵanyn, úkimet taratylǵanyn jáne shekaralar jabylǵanyn, elde komendanttyq saǵat engizilgenin habarlady.
Dýmbýıanyń aıtýynsha, barlyq saıası tutqyn bosatylǵan. Sondaı-aq bılik 18 aı ishinde ýaqytsha úkimetke beriledi. Osylaısha, 11 jyl boıy el basqarǵan 83 jastaǵy prezıdent bılikten ketti.
«Eger elıta halyqtyń pikirin eskerip, jaǵdaıyn jasamasa, onda halyqqa bostandyq áperý áskerdiń qolynda», dedi Dýmbýıa.
Tolqýlar bastalǵannan keıin prezıdent qaıta kóringen joq. Biraq áleýmettik jelilerde taralǵan sýretter men kadrlarda jalańaıaq, djınsy shalbar men jartylaı ashyq kóılek kıgen onyń dıvanǵa súıenip turǵany, áskerlerdiń qorshap alǵany kórinedi.
Dýmbýıa prezıdenttiń jáne basqa da joǵary laýazymdy sheneýnikterdiń qamaýǵa alynǵanyn habarlady. Sondaı-aq ol mınıstrler men mekeme basshylaryn kezdesýge shaqyryp, kelmegenderge jaza qoldanylatynyn eskertti.
