Sport • 09 Qyrkúıek, 2021

Qutqarýshylar kúsh synasty. Qaraǵandyda órt sóndirý-qutqarý sportynan álem chempıonaty ótti

52 ret kórsetildi

Kenshiler astanasyndaǵy «Shahter» ortalyq stadıonynda órt sóndirý-qutqarý sportynan erler arasyndaǵy XVI álem chempıo­naty jáne áıelder arasyndaǵy VII álem chempıonaty joǵary deńgeıde ótti.

Dúnıejúzilik dodanyń ashy­lý saltanatynda qutqarýshy sport­shylar Jambyl obly­syn­da ja­rylys saldarynan qaza tap­qandardy bir mınýt ún­sizdikpen eske aldy. Is-sha­raǵa qatysqan mártebeli meı­mandardyń qata­rynda Halyq­aralyq órt són­dirýshiler men qutqarýshylar sport fede­ra­sııasynyń prezıdenti, Be­la­rýs Respýblıkasynyń Tó­ten­she jaǵdaılar mınıstri Va­dım Sınıavskıı, Reseı Fede­ra­­sııa­synyń Azamattyq qor­ǵa­nys, tótenshe jaǵdaılar jáne ta­bıǵı apattardyń saldaryn joıý mınıstriniń birinshi orynbasary Aleksandr Chýprııan boldy.

Jalpy, О́rt sóndirýshiler men qutqarýshylardyń halyqara­lyq sport federasııasy jáne Qa­zaqstan Respýblıkasynyń Tóten­she jaǵdaılar mınıstrligi uıym­dastyrǵan jarystyń pan­demııaǵa baılanysty sanıtarlyq-karantındik talaptardy saqtaı otyryp, kórermensiz ótkenin aıta ketken lázim.

Álem chempıonatyna dúnıe júzi­niń on elinen, atap aıtqanda, Reseı, Belarýs, Slovakııa, Pol­sha, Senegal, Chehııa, О́zbekstan, Moń­ǵolııa, Aýstrııa jáne Qazaq­stan­nan 10 erler jáne 5 áıelder koman­dasy qatysyp, júldelerdi sarapqa saldy.

Aıta ketý kerek, Qaraǵandy dál osyndaı deńgeıdegi jarys­ty ótkizgen Qazaqstannyń ekinshi qalasy. Elimizdiń Tótenshe jaǵ­daılar mınıstri Iýrıı Ilın kenshiler astanasynyń kezdeı­­soq tańdalmaǵanyn aıtady. Onyń pikirinshe, qolaıly logıstıka­ǵa jáne standarttarǵa sáıkes sta­dıonnyń bolýy tańdaýdyń dál osy qalaǵa túsýine tikeleı áser etipti. О́ıtkeni chempıonatty ashyq aspan astynda ótkizý qajet bolǵan eken.

Jarysty uıymdastyrýshy­lar stadıonda qajetti baza da­ıyndap, dodanyń joǵary deń­geı­de ótýine barynsha jaǵdaı ja­sa­ǵan. Qatysýshylarǵa yńǵaıly bolý úshin kıim sheshetin shatyrlar, fýdkort ornatyldy. Qazaq halqynyń ulttyq salt-dástúrimen tanysý maqsatynda arnaıy etno-aýyl qurylǵanyn aıta ketý kerek. Budan bólek, chem­pıonattyń ashylýy aıasynda apattyq-qutqarý tehnıkasy men jabdyqtarynyń kórmesi ótip, onda otandyq ónimder de kelýshiler nazaryna keńinen usy­nyldy.

Álem chempıonatynyń dodasy oqý munarasynyń tórtinshi qabatynyń terezesine shabýyl satysymen kóterilý, 100 metr­lik kedergiler jolaǵynan ótý, jaýyngerlik qanat jaıý jáne 100 metrden tórt órt estafetasy syny boıynsha ótti.

Jarys qorytyndysynda Be­la­rýs quramasy jalpy­koman­dalyq esepte áıelder jáne erler arasynda álem chempıony atandy. Ekinshi júlde Reseı komandasyna buıyrsa, qola júldeni Chehııa quramasy qanaǵat tutty. Al Qa­zaqstannyń erler komandasy jaýyngerlik qanat jaıý jarysynda chempıon atandy.

Týrnırdiń jeńimpazdary men júldegerleri arnaıy kýbok­tardan bólek medaldarmen, dıplomdarmen jáne baǵaly syı­lyqtarmen marapattaldy. Kelesi álem chem­pıonaty О́z­bek­stan­nyń Samarqand qa­la­­syn­da ótetin boldy. Osy­ǵan oraı, jarystyń jabylýyn­da Qazaq­stan quramasy О́z­bek­stan­daǵy árip­testerine О́rt són­dirý­shiler men qut­qarý­shy­lar­dyń ha­lyqaralyq sport fede­rasııasynyń týyn tabys etti.

 

QARAǴANDY

 

Sońǵy jańalyqtar

Álemdegi eń úlken muzdyq erip ketti

Ekologııa • Búgin, 11:05

15169 adam koronavırýs juqtyrdy

Koronavırýs • Keshe

Uqsas jańalyqtar