2021 jyldyń 1 qańtarynan bastap Qazaqstanda jalpyǵa birdeı deklarasııany engizýdiń birinshi kezeńi bastaldy. Ol tórt kezeńnen turady.
«Birinshi kezeńde aktıvter men mindettemeler týraly deklarasııany usyný boıynsha mindettemeler jaýapty memlekettik laýazymdy atqaratyn adamdar men olardyń jubaılary (zaıyptary); memlekettik fýnksııalardy oryndaýǵa ýákilettik berilgen adamdar men olardyń jubaılary (zaıyptary); memlekettik fýnksııalardy oryndaýǵa ýákilettik berilgen adamdarǵa teńestirilgen adamdar men olardyń jubaılary (zaıyptary); Qazaqstan Respýblıkasynyń «Qazaqstan Respýblıkasyndaǵy saılaý týraly» Konstıtýsııalyq Zańyna jáne Qazaqstan Respýblıkasynyń «Sybaılas jemqorlyqqa qarsy is-qımyl týraly», «Qazaqstan Respýblıkasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar naryǵy týraly» Zańdaryna sáıkes deklarasııa tabys etý mindeti júktelgen tulǵalarda týyndady», dep habarlady MKK-de.
Birinshi kezeńiniń deklarasııasyn qaǵaz túrinde usyný merzimi 2021 jylǵy 15 shildede aıaqtalǵan. Elektrondy túrdegi deklarasııa 2021 jylǵy 15 qyrkúıegine deıin jalǵasady.
«Aktıvter men mindettemeler týraly deklarasııany elektrondy túrde Salyq tóleýshiniń kabıneti (cabinet.salyk.kz), «Elektrondy úkimet» portaly (egov.kz) arqyly, sondaı-aq «e-Salyq Azamat» jáne «eGov mobile» mobıldi qosymshalary arqyly tapsyrýǵa jaǵdaı jasalǵan. «Aktıvterdi deklarasııalaýǵa qatysty suraqtar týyndaǵan jaǵdaıda memlekettik kirister organdaryna nemese 1414 nómiri boıynsha, qosymsha 3 nómirin tere otyryp, baılanys ortalyǵyna habarlasýǵa bolady», dep jazylǵan habarlamada.
Sondaı-aq, QR QM Memlekettik kirister komıtetiniń resmı saıtynda (kgd.gov.kz) «Jalpyǵa birdeı deklarasııalaý» bóliminde tolyq aqparatty alýǵa bolady.
Vedomstvonyń jazýynsha, aktıvter men mindettemeler týraly deklarasııany belgilengen merzimde usynbaǵan jaǵdaıda, ákimshilik jaýapkershilik kózdelgen. Birinshi ret ýaqytyly tapsyrylmaǵany úshin eskertý jasalady, eger osydan keıin bir jyl ishinde qaıtalansa 15 AEK mólsherinde aıyppul salynady.
«Aktıvter men mindettemeler týraly deklarasııada tolyq emes, anyq emes málimetterdi usyný úshin de ákimshilik jaýapkershilik qarastyrylǵan. Eger atalǵan buzýshylyq birinshi ret jasalyp, salyqtardyń eseptelýine ákep soqpasa, onda eskertý jasalady. Al eger osyndaı buzýshylyq eskertý jasalǵannan keıin bir jyl ishinde qaıtalansa, onda 3 AEK mólsherinde aıyppul salynady», dep eskertedi MKK.
