«Biz kúdiktiniń merzimin qylmystyq is materıaldarymen tanysý kezeńine uzartý týraly ótinishhatty qarap otyrmyz. 7 shilde kúni tergeý aıaqtaldy, qazir tanysý kezeńinde. Qylmystyq is 133 tomnan turady, zattaı dálel jáne ózge de materıaldar bar. Qazir Birtanovty úıqamaqta ustaý merzimi 14 qyrkúıekte aıaqtalady, al tergeý qorytyndysy boıynsha ispen tolyq tanysýdy aıaqtaý múmkin emes. Osyǵan baılanysty JTT organynyń Birtanovqa úıqamaq merzimin 2021 jyldyń 14 qarashasyna deıin eki aıǵa uzartýdy jáne qanaǵattandyrýdy suraımyn», dedi prokýror Tólegen Jaraspaev.
Keńesý bólmesinen shyqqannan keıin Nur-Sultan qalasynyń mamandandyrylǵan aýdanaralyq tergeý sotynyń sýdıasy Talǵat Aqshabaev pikir bildirdi.
«Kúdikti Eljan Birtanovtyń qylmystyq is materıaldarymen tanysý kezeńinde úıqamaqta bolý merzimin eki aıǵa uzartý týraly qoldaýhat qanaǵattandyrylsyn. Kúdikti Eljan Birtanovtyń qylmystyq is materıaldarymen tanysý kezeńinde úıqamaqta bolý merzimi eki aıǵa, ıaǵnı 2021 jyldyń 14 qarashasyn qosa alǵandaǵy 21 saǵat 56 mınýt ýaqytqa deıin uzartylsyn. Qaýlyǵa shaǵym jasalýy múmkin, ol jarııa etilgen kezden bastap úsh táýlik ishinde ótinish boıynsha qaıta qaralady», dedi sýdıa Talǵat Aqshabaev.
Aıta keteıik, Eljan Birtanov Memleket basshysynyń jarlyǵy boıynsha 2020 jyldyń 25 maýsymynda Densaýlyq saqtaý mınıstri qyzmetinen bosatylǵan.
2020 jyldyń 3 qarashasynda eks-mınıstrge qatysty asa iri kólemde bıýdjet qarajatyn ysyrap etý faktisi boıynsha qylmystyq is qozǵalyp, qamaýǵa alyndy.
2020 jyldyń 7 qarashasynda tórt aıǵa úıqamaqqa alyndy;
2021 jyldyń 12 aqpanynda Nur-Sultan qalasynyń tergeý soty eks-mınıstrdiń úıqamaqtaǵy merzimin naýryz aıynyń sońyna deıin uzartty;
2021 jyldyń 6 mamyrynda sot Eljan Birtanovtyń úıqamaq ýaqytyn 14 maýsymǵa deıin sozdy;
2021 jyldyń 9 maýsymynda Birtanovtyń úıqamaq ýaqyty 14 shildege deıin sozyldy;
2021 jyldyń 14 shildesinde sot eks-mınıstrdiń úıqamaq merzimin 14 qyrkúıekke deıin uzartqan bolatyn.
