Otyrys barysynda depýtattar men memlekettik organ ókilderi balalardyń quqyǵyn qorǵaýǵa qatysty pikir almasyp, zań jobasyn jan-jaqty talqylady.
Májilis Tóraǵasy Nurlan Nyǵmatýlın depýtattardyń bastamasymen ázirlengen zań jobasynda balalardyń turǵyn úı jáne otbasylyq jaǵdaıda múddelerin qorǵaýǵa, qadaǵalaýsyz jáne panasyz qalýdyń aldyn alý máseleleri qarastyrylǵanyn atap ótti.
Nurlan Nyǵmatýlınniń aıtýynsha, sonyń ishinde, býllıng pen kıberbýllıng qoǵamda qatty alańdatýshylyq týdyryp otyr. Balalardy osy qaýipten qorǵaıtyn naqty normalar qajet.
Statıstıkaǵa júginsek, ótken jyly kámeletke tolmaǵandar arasynda 143 sýısıd jáne 306 óz-ózine qol jumsaýǵa áreket etý jaǵdaıy tirkelgen. Tek jarty jyldyń ishinde 105 sýısıd pen 193 ózine qol jumsaý áreketi bolǵan.
«Shynymen býllıng jáne kıberbýllıng óte qaýipti. Ol balalardyń psıhologııasyn buzatyn, sýısıdke alyp baratyn jol. Sondyqtan, jańa aıtyp ketkendeı, balalardy, ásirese, mektep oqýshylaryn býllıng jáne kıberbýllıngten tolyqtaı qorǵaıtyn naqty normalar engizýimiz kerek. Osyǵan baılanysty, ekinshi oqylymǵa deıin tıisti jumys júrgizý qajet», dedi Palata Spıkeri.
Nurlan Nyǵmatýlınniń aıtýynsha, bul zań jobasy qazirgi qoǵamǵa qajet kóptegen máseleni, ásirese, balalardyń quqyǵyn qorǵaý jolyndaǵy problemalardy sheshýge tıis.
Palata Spıkeri atap ótkendeı, qazir balalardy qorǵaý úshin otbasylyq qatynastar, bilim berý, densaýlyq saqtaý salalarynda qosymsha sharalar qarastyryldy.
Zań jobasynda jazylǵan normalar, sonyń ishinde ınternette azamattardy, ásirese, balalardy osyndaı býllıng jáne kıberbýllıng sııaqty qubylystardan qorǵaý kerek. Bul normalar zaman talaby ekenin aıtqan Nurlan Nyǵmatýlın osy zań jobasy Memleket Basshysy Qasym-Jomart Kemeluly Toqaevtyń azamattardy ınternet arqyly qysym kórsetýden zań deńgeıinde qorǵaý jónindegi tapsyrmasyn oryndaýǵa baǵyttalǵanyn aıtty.
Sonymen qatar, Májilis Tóraǵasynyń pikirinshe, bir ǵana zań jobasymen balalardyń quqyǵyn qorǵaý salasyndaǵy problemalardy sheshý múmkin emes.
«Bul jerde, árıne, júıeli sharalar, keshendi tásilder qajet. Ol úshin barlyq múddeli memlekettik organnyń, pedagogtar men ata-analar qaýymynyń birlesip jumys isteýi qajet. Al depýtattyq korpýs óz tarapynan balalardyń quqyǵyn qorǵaý tetigin jetildirý boıynsha zańnamalyq jaǵynan qoldaý kórsetýge daıyn», dedi Nurlan Nyǵmatýlın.
