Atalǵan shtab tamyz aıynda qurylǵan. El ishindegi ekpege qarsy alyp-qashpa áńgime, negizsiz jel sóz áli de basyla qoıǵan joq. Azamattyq shtabtyń maqsaty – óńirlerdi aralap, halyqqa vaksına qabyldaý sharasynyń mán-mańyzyn túsindirip, eldi ekpe týraly shynaıy aqparatqa ǵana senip, máseleniń aq-qarasyn ajyrata bilýge úndeý. Birlestik sapynda saqa sarapshylar men belgili jýrnalıster bar. Munyń syrtynda, olardyń qataryna óńirlerden 200-den astam adam qosylyp otyr.
«Qoǵamdyq kelisim» mekemesinde ótken jıynda sóz alǵan Rahym Oshaqbaev elde júrip jatqan vaksınalaý barysynyń sońǵy nátıjeleri týraly aıtty.
– 6-tamyzda Qazaqstan koronavırýstan qaıtys bolǵandar sany boıynsha álemde ekinshi orynǵa shyǵyp ketti. Ondyqtyń ishinen jıyrma kún boıy túsken joq. Munymen ne aıtqymyz keledi? Biz burynǵy, qalypty ómirge oralýdy qalaımyz. Eger shyn qalasaq, vaksına saldyrýymyz kerek. Ekpe alǵan adam indet juqtyrsa da qatty aýyrmaıdy, ony álemdik zertteýler kórsetip otyr, – dedi azamattyq shtab ókili.
R.Oshaqbaevtyń aıtýynsha, búginde jappaı vaksına qabyldaýdan Danııa memleketi alda keledi. Bul elde halyqtyń 74%-y vaksına qabyldaǵan. Bizdiń elde de ujymdyq ımmýnıtet qalyptastyrý úshin kem degende halyqtyń osynsha kólemi egilýi kerek. Vaksınalaýdy durys júrgizý nátıjesinde danııalyqtar 10-qyrkúıek kúni koronavırýsty asa qaýipti aýrýlar tiziminen alyp tastaǵanyn jarııalapty. Bul sanatta Izraıl de bar.
– Bul memleketterde indettiń tórtinshi tolqyny bastalǵandyqtan, vaksınalaý qaıta júrgizilmek. Biraq onda ólim-jitim óte az, óıtkeni ekpe alǵandar kóp, – dedi R.Oshaqbaev.
Qazaqstanda indettiń taralýy báseńdep keledi. Alaıda jurttyń vaksına qabyldaýy da kesheýildep qalǵan. Azamattyq birlestik ókilderiniń aıtýynsha, óıtkeni durys aqparat kópshilikke jetpeı, orta jolda burmalanyp ketip jatyr, munyń syrtynda eldiń úreıin týdyratyn jalǵan aqparat taratýshylar kóp.
– Kórip otyrmyz, jurtshylyq arasynda, áleýmettik jelide vaksınaǵa kúmán týdyratyndar áli de kezdesedi. О́tiriktiń shegi joq, neshe túrlini oılap shyǵara beredi. Biraq biz kózimiz ashyq adambyz ǵoı, sonyń bárin saralaı bilýimiz kerek. Halyqqa durys málimet berilýi tıis. Osy maqsatty ustanyp, óńirlerdi aralap, túsindirip júrgen jaıymyz bar, – dedi shtab múshesi, astanalyq zańger Serik Berkamalov.
«Elim úshin egilemin» respýblıkalyq azamattyq shtaby ókilderi jumys saparynyń ekinshi kúni óńirlik kommýnıkasııa ortalyǵyna baryp, BAQ ókilderimen kezdesti.
– 19-tamyz kúni Qazaqstanda Covid-19 ınfeksııasynan 163 adam kóz jumdy. Osylaısha indetten qaıtys bolǵandar sany boıynsha álemde ekinshi orynǵa shyǵyp ketken edik. Qazir naýqastar azaıyp keledi. Oǵan kóp úles qosqan medısına mamandary ekeni daýsyz. Azamattyq qoǵam bul úrdisten árqashan qalmaýy kerek. Bizdiń de kómegimiz mańyzdy. Vaksına – pandemııany toqtatyp, qalypty ómirge oralýdyń birden-bir joly. Azamattyq shtabtyń qurylý sebebi de osy – qalypty ómirge ákeletin ýaqytty qysqartý, – dedi Serik Berkamalov.
Sanıtarııalyq-epıdemııalyq baqylaý komıtetiniń resmı ókili Erjan Baıtanaev sońǵy málimetterdi keltire otyryp, vaksınalaýdyń mańyzdy ekenine taǵy bir toqtalyp ótti.
– Qazir 76 858 adam koronavırýsqa shaldyǵyp, aýyryp jatyr. Onyń 15 308-i stasıonarda, 61 550 adam ambýlatorııalyq deńgeıde em qabyldaýda. Atap aıtsaq, 1 196 adamnyń jaǵdaıy aýyr, 345 pasıenttiń ahýaly óte nashar jáne 194 adam ókpeni jeldetý apparatymen tynystap jatyr. Sondyqtan pandemııadan shyǵar jalǵyz jol – jappaı vaksına qabylaý ǵana, – dedi komıtettiń resmı ókili.
E.Baıtanaevtyń aıtýynsha, elimizde ekpe alǵan 15 myń adam vırýs juqtyrǵan, alaıda olardyń bári indetti jeńil eńsergen. Baspasóz jıynynda monıtorıngtik toptardyń jumysy jóninde de málimet aıtyldy. Bıyl karantın talaptary buzylǵany týraly 25 073 fakt tirkelip, 105 nysan jabylǵan. Ákimshilik jazaǵa 23 myń azamat tartylǵan, olarǵa salynǵan aıyppuldyń jalpy somasy –1,9 mlrd teńge.
«Elim úshin egilemin» azamattyq shtaby qolǵa alǵan ekpe alýdyń mańyzdy ekenin el ishinde túsindirý jumystary tamyz aıynda bastalǵan. Shtab ókilderi bul sharanyń qazan aıyna deıin jalǵasatynyn aıtty. Olar osy ýaqyt aralyǵynda barlyq aımaqty qamtymaq nıette.
