Tórt jylǵa jýyq ýaqytqa sozylǵan Uly Otan soǵysynyń taǵdyryn túbegeıli aıqyndaǵan, otandastarymyzdyń boıynda eń alǵash ret Uly Jeńiske degen senimdi ornyqtyrǵan kezeń – Kýrsk ıinindegi sózben aıtyp jetkizgisiz qııan-keski shaıqas bolyp tabylady. Bıylǵy qańtar aıynda ekinshi dúnıejúzilik soǵys barysyna kúrt betburys ákelgen osy tarıhı shaıqasqa jetpis jyl tolyp otyr. Atalǵan qasterli dataǵa oraı Oral qalasynda Batys Qazaqstan oblystyq ardagerler keńesiniń bastamasy boıynsha Kýrsk shaıqasyna qatysqan maıdangerlerdiń kezdesýi ótkizildi.
Tórt jylǵa jýyq ýaqytqa sozylǵan Uly Otan soǵysynyń taǵdyryn túbegeıli aıqyndaǵan, otandastarymyzdyń boıynda eń alǵash ret Uly Jeńiske degen senimdi ornyqtyrǵan kezeń – Kýrsk ıinindegi sózben aıtyp jetkizgisiz qııan-keski shaıqas bolyp tabylady. Bıylǵy qańtar aıynda ekinshi dúnıejúzilik soǵys barysyna kúrt betburys ákelgen osy tarıhı shaıqasqa jetpis jyl tolyp otyr. Atalǵan qasterli dataǵa oraı Oral qalasynda Batys Qazaqstan oblystyq ardagerler keńesiniń bastamasy boıynsha Kýrsk shaıqasyna qatysqan maıdangerlerdiń kezdesýi ótkizildi.
Osy kezdesýde Kýrskidegi surapyl urystarǵa qatysyp erlik kórsetken 21 batysqazaqstandyq maıdanger «Kýrsk ıinindegi jeńiske – 70 jyl» eskertkish medalimen marapattalǵany jónindegi derek alǵa tartyldy. Sonyń ishinde Lıdııa Gýbanova, Pavel Býkatkın jáne Nıkolaı Kotelnıkov sekildi Kýrsk shaıqasynyń qaharman sarbazdaryna atalǵan nagrada kezdesý kezinde tabys etildi. Osy oraıda, eskertkish medal Kýrsk oblysynyń gýbernatory Aleksandr Mıhaılovtyń atynan kelgenin aıta ketken jón.
Osyndaı mereıli sátten keıin júzi rızashylyq pen qýanyshtan nurlanyp turǵan soǵys ardageri Nıkolaı Kotelnıkov óz yqylasy men sezimin bylaısha jetkizdi:
– Soǵys bastalypty degen tóbeden jaı túsirgendeı habardy estigende biz mektepti aıaqtap, bal keshin ótkizip jatyr edik. Ol kezde on jetide ǵanamyz. Kámeletke kelmegen kezimiz. Bal keshin kúrt toqtattyq ta, synyptaǵy 32 túlek túgeldeı áskerı komıssarıattan bir-aq shyǵyp, maıdanǵa alý jóninde ótinish jazdyq. Tilegimiz qabyldandy. Kóp keshikpeı eki aılyq barlaý mektebine oqýǵa kirdik. Ony aıaqtaǵan soń bizdi Zaporojedegi Orehovo qalasyna jiberdi. Odan ári 226-shy dıvızııa quramynda urysqa kirdik. Soǵystyń aty – soǵys. Ol eshkimdi mańdaıynan sıpamaıdy. Qııan-keski joryqtar barysynda kóptegen qarýlastarymyzdy joǵalttyq. Kýrsk ıininde de solaı boldy. Biz búginde olardyń óshpes rýhyna bas ıemiz.
Temir QUSAIYN,
«Egemen Qazaqstan».
ORAL.
