Batys Qazaqstan oblysynyń Oral qalasynda ishki ister organynyń úsh qyzmetkeri para aldy degen kúdikpen qarjy polıseıleriniń qolyna tústi. Bul týraly «Qazaqstan» telearnasy habarlady.
Polısııa bóliminiń eki kishi jedel ókiletti qyzmetkeri men ýchaskelik ınspektordyń kómekshisi bank menedjeriniń zańsyz nesıe bergenin anyqtapty. Olar osy keleńsizdikti tirkemeı, bank qyzmetkerin qylmystyq jaýapkershilikten qutqaryp jiberý úshin 1 mln. teńge talap etken. Al bank qyzmetkeri olardyń bul áreketin qarjy polısııasyna málimdep, bastapqyda aqsha bopsalaýshylarǵa 700 myń teńge beredi. Keıin belgi salynǵan 300 myń teńgeni tártip saqshylary alý sátinde qarjy polısııasy qyzmetkerleriniń qolyna túsken.
«Osy fakti boıynsha Qylmystyq kodekstiń 311-babynyń 4-bóligimen qylmystyq is qozǵaldy. Oral qalalyq sotynyń qaýlysymen qylmystyq polısııa bóliminiń eki qyzmetkeri 2 aıǵa qamaýǵa alyndy. Taǵy bir polısııa qyzmetkerine úı jaǵdaıynda qamaýda otyrýyna sheshim shyqty», - deıdi oblystyq sottyń baspasóz hatshysy Aıjan Jumajanqyzy.
Ámirhan Almaǵanbetov.
Derekkóz: «Qazaqstan» telearnasy, «24 kz».
Foto: «24 kz».
