Kardıologııa jáne ishki aýrýlar ǵylymı-zertteý ınstıtýtynyń basqarma tóraǵasy, medısına ǵylymdarynyń doktory, professor Roza Qýanyshbekovanyń aıtýynsha, medısına qarqyndy damyǵan saıyn dárigerdiń jumysy únemi jańa tehnologııalardy, dıagnostıka men emdeýdiń jańa ádisterin meńgerýdi talap etedi.
«Sımýlıasııalyq tehnologııalardy qoldaný oqý úderisin tıimdi etýge múmkindik beredi. Bul – oqytýshylar men dáris alýshylardyń mejelengen nátıjege qaýipsiz qol jetkizýiniń tóte joly. Ásirese pandemııa kezinde munyń kómegi zor. Bul tehnologııalardy qyzmetkerlerdiń biliktiligin arttyrý prosesine engizý – obektıvti qajettilik», deıdi Roza Toqtanáliqyzy.
Júrek aýrýlaryn indete zertteıtin ınstıtýtta qyzmet etetin júrek-ókpe reanımasııasy, ıntervensııalyq kardıologııa jáne arıtmologııa sımýlıasııa ortalyqtary, sondaı-aq gıbrıdti zerthanalar rezıdentter men dárigerlerdiń teorııalyq jáne praktıkalyq daǵdylaryn meńgerýge aıryqsha serpin bergen.
«Bilim alýshylardyń Simbionix ANGIO Mentor Suite sımýlıatorynda endovaskýlıarlyq aralasýlardyń daǵdylaryn meńgerýge múmkindikteri bar. Bul – naqty ýaqyt rejiminde rentgenoskopııanyń baqylaýymen oryndalatyn endovaskýlıarlyq prosedýralardyń kompıýterlik medısınalyq sımýlıatory. Ol angıografııa, angıoplastıka jáne stentteý sekildi endovaskýlıarlyq prosedýralardy júrgizýdiń jeke nemese komandalyq jattyqtyrýyn usynady», deıdi rentgenoendovaskýlıarlyq operasııa blogynyń meńgerýshisi, ıntervensııalyq kardıolog, rentgenhırýrg Alekseı Kolesnıkov.
Júıeniń anatomııalyq qurylymdardy shynaıy 3D kórsetý jáne ıntervensııalyq quraldardy paıdalana otyryp prosedýralardy shynaıy ımıtasııalaý jáne taktıldi sezimder jasaý qabileti bar. Simbionix ANGIO Mentor koronarlyq aralasýlardyń negizgi daǵdylary jónindegi modýldi qamtıdy, onda júrek tamyrlaryn stentteý kezindegi asqynýlar boıynsha sımýlıasııalyq baǵdarlamalar, asqynýlarmen kúresýdiń praktıkalyq daǵdylaryn ázirleý jáne jiti koronarlyq sındrom kezindegi ıntervensııalyq aralasýlar engizilgen.
Mundaǵy daǵdarystardy zertteý ortalyǵynyń (Lıtva, Kaýnas qalasy) qoldaýymen qurylǵan gıbrıdti zerthana óz tıimdiligin kórsetken. Daǵdarystardy zertteý ortalyǵy ázirlegen oqytý ádistemesi bilimdi tez jáne tıimdi taratýǵa, sondaı-aq personaldyń praktıkalyq daǵdylaryn tájirıbede qoldanýǵa múmkindik beredi. Táýlik boıy tynymsyz jumys isteýge qaýqarly zerthana mamandardyń praktıkalyq daǵdylaryn qalyptastyrý deńgeıin arttyra túsken.
Kardıologııa kafedrasynyń basshysy, medısına ǵylymdarynyń kandıdaty Aısulý Musaǵalıevanyń aıtýynsha, barlyq sabaq beınetaspaǵa jazylyp, prosesti arnaıy nusqaýshy baqylap otyrady. Kýrs aıaqtalǵannan keıin qorytyndy tapsyrma berilip, taspaǵa jazylǵan jumys nusqaýshy tarapynan baǵalanady. Mamandardyń pikirinshe, gıbrıdti zerthana bazasynda ótetin «Jedel kardıologııalyq kómek», «Mamandandyrylǵan reanımasııalyq kómek», «Bastapqy baǵalaý jáne COVID-19 ınfeksııasy bar pasıentterdi emdeý» jáne t.b. taqyryptaǵy kýrstar da óz tıimdiligin kórsetken.
