Irikteý syny aıaqtalyp, negizgi jarysta jerlesterimizdiń arasynan alǵashqy bolyp kortqa 20 jastaǵy Tımofeı Skatov shyqty. Álemdik reıtıngte 280-orynda turǵan ol Andreas Seppımen saıysqa tústi. 37 jastaǵy Italııa tennısshisiniń esimi jankúıerlerge jaqsy tanys. ATR týrnırlerin úsh ret utqan Seppı kezinde Ýımbldon men Rolan Garrostyń tórtinshi kezeńinde óner kórsetken. Al Aýstralııanyń ashyq birinshiliginde tórt ret dál sol mejege deıin jetti. Osy tabysynyń arqasynda álemniń 18-raketkasy atandy. Qazirgi kezde Andreas úzdikter tiziminde 87-oryndy ıelenýde.
Desek te Tımofeı azýly qarsylasynan esh qaımyqqan joq. Ásirese, alǵashqy settegi oıyny keremet áser qaldyrdy. Kezdesý barysynda 1:4 esebimen jeńilip jatyp, básekeni taı-breıkke deıin jetkizdi. Sheshýshi tusta shıraq qımyldaǵan Skatov jeńisti Seppıdiń ýysynan julyp áketti – 7:6. Ekinshi sette Apennın túbeginiń túlegine ese jiberdi – 4:6. Desek te úshinshi setti Tımofeıdiń mysy basym boldy – 6:1. Osylaısha, Nur-Sultandaǵy týrnırde alǵashqy sensasııa tirkeldi. Endi Skatov Belarýs eliniń ókili Ilıa Ivashkomen kezdesedi.
Keshe Dmıtrıı Popko aýstralııalyq Djon Mıllmanmen sheberlik baıqasa, búgin Mıhaıl Kýkýshkın jasyl qurlyqtyń taǵy bir ókili Djeıms Dakvordpen kúsh synasady. Alǵashqysy álemdik reıtıngte 48-orynda tursa, ekinshisi 65-satyǵa jaıǵasty. Biraq bizdiń jigitter óz jankúıerlerin jerge qaratpaý úshin kortta baryn salady dep oılaımyz. Al jarysty ekinshi aınalymnan bastalaǵaly otyrǵan Qazaqstannyń birinshi raketkasy Aleksandr Býblık búgin ATR tiziminde 60-oryndy enshilep otyrǵan serbııalyq Mıomır Kesmanovıchke qarsy oınaıdy.
